玩黑膠盤同玩菲林相機有少少似，只要明白每個部件是甚麼、有甚麼功能，每個黑膠唱盤其實大同小異，以下就同有興趣玩黑膠嘅朋友逐 part 睇吓一個唱盤由甚麼部件組成，各自的功能又係咩啦！
近年黑膠復興，不少朋友都有興趣想玩吓聽吓，不過其中一個障礙可能是唱盤的操作。同 CD 機一放碟就播到有少少不同，黑膠唱盤望落已經比較複雜。實際上玩黑膠盤同玩菲林相機有少少似，都係傳統品味、機械式操作，不過一理通百理明，只要明白每個部件是甚麼、有甚麼功能，每個黑膠唱盤其實大同小異，以下就同有興趣玩黑膠嘅朋友逐 part 睇吓一個唱盤由甚麼部件組成，各自的功能又係咩啦！
唱頭可算是唱盤最重要其中一部分，由唱針、唱殻等組成，唱針就負責「讀取」黑膠唱片凹凸坑紋上記錄的聲音、音樂。主要分為 MM（Moving Magnet）、MC（Moving Coil）同較小眾的 MI（Moving Iron）幾種。MC 分析力較好，不過就多數較貴；MM 輸出電壓較大，入門唱盤多數用佢；唔同唱頭對音質、音色影響都好大㗎，不過入門唱盤有時就無得換唱頭。
唱臂主要負責將唱頭拾取的音訊傳遞到前級放大，有直臂、曲臂等不同設計，後者有 S 形、 J 形等形狀，常見的長度有 9 吋、10 吋、12 吋等，而支撐唱臂常見的方式有單點支撐軸承、刀鋒支掌軸承等。唱臂最重要是夠輕、夠硬淨，諧振少，唔同長度同設計都會影響音質。
成個唱臂結構就好似一個秤砣，而尾陀就正是用來調節針壓。尾陀有刻度、可旋轉，轉幾多唱頭的針壓就重幾多，而重量以「g」（克）做單位，視乎唱頭、唱針的規格做設定，常見的有 1.5g、2.0g 不等。針壓校重啲，低頻會豐厚啲，雖然有 0.2-0.3g 的「走棧位」，不過針壓太重會傷碟，調校要小心。
黑膠播放的時候，唱片轉動、唱針循唱片坑紋拾音，形成一個向內的引力。如果唔處理的話，唱針接觸內坑紋的壓力就會大過外坑紋（內外坑紋對應左右聲道音訊），變成左邊聲大過右邊聲。而偏壓的調節就可以將這個向心力平衡返，通常可以針壓的數值作最大值標準，由小至大慢慢調節，呢個時候就要耳仔去「驗貨」，直至兩邊聲道平衡就 OK。
黑膠唱片有每分鐘 33 轉（實際上是 33 ⅓ 轉）、45 轉同 78 轉幾種，現時主流是 33 轉，播碟的時候揀返對應唱片的轉速，唔係就會高音或者低音咁變聲走音。45 轉比較多是特別版，轉得快就快播完、曲目亦較少，不過聲軌密度相對較低，所以理論上音質會較好。而 78 轉則是早期產物，現時二手都幾較難搵到。
黑膠唱盤以摩打驅動，一路發展以來，主要分為「直驅式」、「帶動式」、「惰輪式」等幾種驅動方式。當中帶動式就最普及，因為有皮帶緩衝，可以吸收摩打振動，令轉動更平順連貫，不過就有起動遲緩、皮帶會老化等問題；直驅式換言之就係直接以摩打驅動轉盤，起動快、扭力足，不過要解決振動問題需要相當高技術，也曾經是高階的代名詞，現在和惰輪式都較為少見。
雖然話唱盤結構大同小異，不過愈貴價、愈高階的唱盤，部件就分得愈細，可以設定同調校的部分就愈多。而入門唱盤就基本上離不開上面介紹的各個部分，雖然知道各個部件的名稱同功能，不過實際上要點樣設定先啱？想玩好聲要做咩基本調校？可以繼續留意我哋之後嘅介紹。
想瀏覽更多 SPILL 視聽專題，請即按 https://www.spill.hk/features/
緊貼最新資訊，請關注 SPILL 的 Facebook 專頁、Instagram 帳戶及 YouTube 頻道。如欲訂閱 SPILL Paper 電子通訊可按這裡。
