又一城 AMC 戲院結業後，由 MCL 強勢入主，經過一段時間的裝修後，將會於明天（6 月 8 日）正式啟用，趕得切睇姐卵有份做嗰套《非常盜 2》。在介紹戲院之前，不妨講個好消息畀大家知，這個名為 Festival Grand Cinema 的新戲院，將於 7 月舉辦彼思（Pixar）30 周年電影節。

Pixar 動畫冇乜人未睇過，從 3 集《反斗奇兵》、《怪獸公司》、《太空奇兵．威 E》，到近期的《玩轉腦朋友》、《恐龍大時代》，都是創意與娛樂性兼備，深受大眾歡迎。雖然 Pixar 到 1995 年才推出第一部動畫長片《反斗奇兵》，但實情公司早於 1986 年 2 月已正式營運，今年已昂然步入 30 周年。Festival Grand 將於 7 月至 8 月放映多部 Pixar 經典作，詳情有待公佈，大家要密切留意了。

除了 7 月的彼思 30 周年電影節外，影癡們很熟悉、由香港國際電影節創辦的「電影節發燒友」節目，由 7 月下旬開始，Festival Grand 亦會加入成為放映場地之一，意味著這家戲院將會有更多主流電影以外的選擇。7 月 29 日至 31 日，就會率先放映《東京物語》（小津安二郎）、《飯》（成瀨巳喜男）和《開路先鋒》（George Miller）等多部影史上的經典，相信日後會有更多影癡和文青在又一城聚腳了。

緊貼最新資訊，請讚好 SPILL Facebook 專頁。