香港國際電影節剛剛完滿結束，瘋狂影迷可能會若有所失，為收工原來要返屋企而感到空虛。不過，香港無乜嘢多，除了人多，就是電影節多。早兩年「辛丹斯電影節」已經開始搞「香港版」，年初在美國首映的佳作，秋季左右香港就睇得到。「香港版」其實只是整個影展的冰山一角，今年連「Midnight」環節都搬埋過嚟，對影迷而言可以話係又一盛事。

好多電影節都有「Midnight」環節，頂尖兼嚴肅如康城影展都有，香港國際電影節也有一個「我愛午夜長」的環節，深受大眾歡迎。「Midnight」環節選映的作品，一般都在午夜子夜深夜放，過了需要家長指引的時段，內容題材一般都較大膽，可以是驚悚恐怖核突情色，很多人愛挑戰自己，睇「Midnight」環節的戲某程度上也是一種挑戰。

這次選來的 4 部電影都曾在 2016 年的辛丹斯電影節「Midnight」環節放映，雖然未新鮮滾熱辣到是 2017 年的片單，但全部未在港上映過，而且都是有口皆碑的作品，可能幾個奇詭鏡頭，就足夠影迷興奮到瞓唔著。

熟悉「Cult 片」的朋友，可能對《瑜珈妹豬大戰納粹香腸》（Yoga Hosers）最感興趣，齋睇片名就知係騎呢之作。導演 Kevin Smith 廿幾年前就憑《便利店氹氹轉》（Clerks）與《猜情尋》（Chasing Amy）揚名，無睇過呢兩部戲唔好同人講你係 Cult 片專家。新作《瑜珈妹豬大戰納粹香腸》繼續怪雞，講兩個同名少女以瑜珈絕技打壞蛋，值得一提的是，這兩名少女分別由 Kevin Smith 的女兒和 Johnny Depp 的女兒飾演，都是 17 歲青春少艾，老豆咁巴閉，會否演得特別放？

另一部不得不提的是《德黑蘭魅影》（Under the Shadow），在今年的英國電影大獎（BAFTA）拿了「最佳英國首作」獎，同時亦代表英國出戰奧斯卡角逐最佳外語片，甚有來頭。故事背景設於 1988 年兩伊戰爭期間，德黑蘭飽受戰火摧殘，表面上好似好政治，但其實慢慢會變成靈異故事，怪異事件接二連三出現！以這樣的手法講戰爭如何令人精神繃緊，可謂創意非凡。

另外兩部《暗中作嚇》（The Blackout Experiements）和《油淋淋殺人狂》（The Greasy Strangler），一部驚嚇一部血腥，後者更被美國《滾石》雜誌選為 2016 年最核突電影，睇你夠唔夠膽挑戰！

4 部電影將會於 5 月 26 日至 8 月 11 日期間，逢星期五「Sundance Friday」輪流於星影匯放映，每部戲各有 3 場，不過放映時間其實係 9:50p.m. 而不是午夜（吓！），詳情可按此或瀏覽官方 facebook 專頁。

緊貼最新資訊，請關注 SPILL 的 Facebook 專頁、Instagram 帳戶及 YouTube 頻道。如欲訂閱 SPILL Paper 電子通訊可按這裡。