雖然事前設置味道濃郁,但扮窮人的韓仔 model Kevin Kreider 交足戲,而那班名流和富豪朋友又夠離地,所以節目仍然精彩。節目想反映富人的日常生活問題與內心角力,但出來卻喜感十足,暴發名緩擔心世界末日要電單車「逃生」;她坐低受訪,幾乎每一鏡換一套衫 set 一次頭而又不重複。科網大亨二世組不事生產,做 KOL 月入比正常打工仔搵得更多,卻被朋友指「要生性」,因為搵錢連買一季衫的數都未夠找。軍火商後人不問世事,心情好就飛去巴黎 shopping,買衫要 personal shopper 帶齊全季產品上門慢慢揀,朋友帶子女上門造訪就給最奢華的珠寶首飾當玩具玩。而演窮人角色,帶觀眾走入富人圈的 Kevin 仔,扮得無欲無求最後同人爭追有錢女,跟出跟入參加名人派對,明明身價過億卻盡顯傍友(擦住上)本色。
有人為爭比華利山女皇之名互出陰招暗中較功,富人身邊一班睇相佬與通靈師亂噏廿四水鬼升城隍,遠離世道的富二代們不是爆買衫褲海味與首飾,就是封街開 party 做騷炫耀一番。你想看的揮霍,有;你想不到的黐線行為,更多。窮不緊要,食住花生看不知搵食為何物的上流人團團轉,已可望梅止渴。