AMC 又一城戲院今年 1 月租約期滿，由洲立影藝旗下的 MCL 院線接手，裝修了好幾個月之後，今日（6 月 8 日）正式開幕。MCL 今年動作多多，港島南區的 MCL 海怡才剛於 3 月開幕，6 月就有新品牌 Festival Grand 面世，是 MCL 院線的旗艦店。
AMC 又一城戲院今年 1 月租約期滿，由洲立影藝旗下的 MCL 院線接手，裝修了好幾個月之後，今日（6 月 8 日）正式開幕。MCL 今年動作多多，港島南區的 MCL 海怡才剛於 3 月開幕，6 月就有新品牌 Festival Grand 面世，是 MCL 院線的旗艦店。
由於 Festival Grand 是在 AMC 又一城原址裝修重開，所以基本「結構」並沒有大改，感覺仍然很熟悉，唔會行錯路。當然，室內設計會完全不同，座椅、器材亦會換過晒，除非舊客去慣去熟，否則應該都有新鮮感。
洲立影藝再次找來合作無間、獲獎無數的 AGC Design 負責室內設計，概念是「睇戲都係一件盛事」，所以大堂感覺是金光閃閃，十分華麗。構思並唔誇張㗎，以前睇戲的確是件大事，是一項好大的娛樂活動，就好似外國人去睇音樂劇、歌劇，要盛裝出席。Festival Grand 當然唔會有 dress code，但設計上就想重拾這份情懷；其實依家睇戲動輒成百蚊一張飛，入到戲院，感覺 Grand 啲，感覺都抵啲（好似係）。
所以，走上扶手電梯，在小食部對出等入場塊空地，抬頭一望，就係由古銅鋁片砌成的天花板，時尚到震，最過癮是可以透過燈光調校，營造不同氣氛，不同場合便可以帶來不同感覺，唔錯唔錯。
AMC 又一城原來的 7 個影廳位置不變，不過在重新裝修之後，最大的 1 院就有 Dolby Atmos 設備，也是 MCL 首個配備 Dolby Atomos 的影廳（不計與邵氏合營的 The Grand Cinema 的話）。喇叭全採用 QSC 出品，14 隻天花，加 23 隻環繞、3 隻前置，以及 4 個超低音，26.4.14 的架構，包圍感很不錯。1 院配備 Sony 4K 投影機，當然亦有 3D 播放系統，基本要求絕對達到。
除了「原有」的 7 個影廳外，Festival Grand 比起之前還多一個貴賓廳，有 18 個豪華寬敞座位，而且採用了之前 MCL 海怡的「無機房」設計，操控更簡便。而對於音響玩家而言，最吸引的肯定是配置了 B&W 的 CT 800 系列入牆喇叭，是這個英國品牌首次在大中華地區與戲院合作，之前大家想在戲院聽到 B&W 音響設備的極品音色，最近都要去到韓國的 CGV Cinema。視覺享受方面，有別於 1 院用 Sony，貴賓廳用 Barco 投影機，可投影 5米×3米的畫面。座位十分舒適，觀眾可自行調校椅背斜度和腳踏高度，又設有 USB 充電位，不過筆者覺得貴賓廳第一行都幾前，可能真係要將椅背校到瞓喺度先至最舒服。
至於 2 至 7 院，則全是 7.1 音響系統，同樣有 Sony 4K 投影設備。所有影廳加起來共有 1,196 個座位（另有 14 個輪椅位），相信都可以滿足區內居民需要吧？
地址：九龍達之路 80 號又一城 UG 層
網址：www.mclcinema.com
