Bang & Olufsen 的產品外形一向都相當獨特同型格，今次旗下品牌 B&O PLAY 剛剛推出的藍牙喇叭仔 Beoplay A1 都唔例外。大概係一個手掌大小，圓形全金屬面設計，市面上的藍牙喇叭多種多樣，呢個款式都算少有。至於音效方面表現又點？第一個印象係估唔到佢喇叭細細咁爆得！

Beoplay A1 出自名設計師 Cecilie Manz 手筆，之前的 Beolit 15 同 Beoplay A2 都係由佢操刀。喇叭有銀色同軍綠色選擇，採用了混合搭配的物料作設計：鋁金屬圓形面罩、雙模聚合物基座、皮革物料的吊繩，配襯得相當和諧。圓滑的質感摸上手好舒服，不過質感強代價就係機身重，600g 的重量其實真係唔算太便攜，雖然掛在背包上的確幾有型。

雖然只係小型藍牙喇叭，不過 B&O 都幾落重料，採用了鋁製錐形中低音單元、3/4 吋絲質半球形高音單元同音級 DSP 技術作音效處理。內置了 2,200mAh 的充電式鋰電池，筆者測試期間斷斷續續播了 3 日都唔使再充電。電源以 USB Type-C 連接、支援 3A 的高電流快充，好彩喇叭本身會送 USB-C 線，不過筆者自己就真係無快充的火牛可以試。

音樂播放測試

試聽部分就用 Sony Xpera Z3 及 Surface Pro 4 以藍牙連接及 Spotify 播放，連接相當穩定，在幾日的測試過程當中，大約 5-10m 範圍內都無試過斷聲。Hand-free 收音都相當清晰，平時聽聽吓歌都唔怕接電話，不過就要小心放人地把聲出來太大聲。

播流行曲好「完美」

基本上 Beoplay A1 一開聲就有驚喜，好難想像一隻咁細的喇叭可以有咁大的能量，令成張檯面都有震動的感覺。也難怪喇叭要比較重身，咁大的輸出，如果箱身太輕的話諧振、共鳴的問題就已經夠令音質大打折扣。而 A1 播 Ed Sheeran 的〈Photograph〉這類節奏明快的歌曲實在極之適合，低音質感一流、量感充足，人聲分析力相當好，音樂感亦夠強，聽呢類歌實在無咩缺點。

低頻勁係把「雙刃劍」

到播 George Ezra 現場演唱的〈Budapest〉，低音較多，而且是不停在低頻之間「徘徊」。由於 A1 的低頻量本來就較多而且偏柔、延伸較長，這類不停重複節奏鼓聲或者 Bass 的音樂會令低音比較「撞聲」，除了影響本身低音的分析力之外，也削弱了人聲的分析力，算是較大的缺點。放在金屬檯面會有少許改善，另一個做法就是將喇叭「吊起」，減少低頻諧震，不過鼓聲和 Base 弦線的質感就會唔夠突出。

清唱幾有「Hi-Fi味」

最後試一試慢歌，估唔到 A1 播 Ruth B 的〈Lost Boy〉這類柔和、接近清唱、少少「發燒」的音樂亦十分適合，因為 Beoplay A1 的中頻分析力十分好，在少了低音干擾的情況下表現更加出色。配合少量鋼琴、弦樂的配襯，那種金屬的重量感同質感，甚至有少少「Hi-Fi」的感覺，值得一讚。

總結：

以兩千元來說，買藍牙喇叭有少少偏貴，不過就已經是 B&O 喇叭系列的平價款。雖然「平」，不過都絕對無偷工減料，起碼個殻都夠晒重手。600g 的重量不算太便攜，但都要有返咁重先可以好似而家 Beoplay A1 爆得咁勁、咁好聲。人聲細緻爽快、分晰力高，低頻量夠、質感好，唯一係播放一些持續有低音的中慢節奏音樂時分析力會有所下降。以小型藍牙喇叭來說音質絕對收貨，甚至同一些入門書架喇叭有得一拼，估佢唔到！

Speicifications

• 輸出功率：30W × 2（峰值為 140W × 2）
• 頻率響應：60Hz-24kHz
• 連接：3.5mm audio、USB Type-C（充電用、支援 3A 快充）
• 體積：48×133mm
• 重量：0.6kg
• 售價：$1,998
• 查詢：B&O（2918 0007）

緊貼最新資訊，請讚好 SPILL Facebook 專頁。