之前同大家試過 Blue Aura V32 Blackline 微型膽機組合，個樣夠型仔，聲效同功能亦都唔錯。而同呢類膽機組合最襯的器材，相信就係近年又多人玩返的黑膠唱盤，所以大昌最近就推出了 Blue Aura 另一款膽機組合 V40 和 TEAC TN-300 入門唱盤的「套裝」，比起單獨買平返千幾蚊。今次就借齊呢套「懷舊」音響組合，睇下黑膠同膽機係咪真係咁夾。

更大功率、大喇叭升級

相比起之前試的 V32，今次的 Blue Aura V40 在功率方面由每聲道 20W 提升至 30W，而且配套的 PS40 喇叭亦都大了一個碼，採用了 1 吋軟球頂高音及 4.5 吋鋁低音單元，可以預期音量方面會有幾大的提升。採用了兩隻環形火牛驅動，調聲方面就交由兩組 12AU7/ECC82 真空管負責，中間的 6E2 膽管就用來顯示音量，同時更能隨著音樂閃動。主機設有 RCA、3.5mm audio 輸入，通過 Micro USB 連接電腦可以支援 24bit/96kHz 的 Hi-Res DAC 解碼，加埋藍牙 4.0 的 aptX 無線連接，無論傳統接駁方式，又或者連接電腦、無線連接手機播歌都好方便。

經典設計 5 色選擇

TEAC 近年的黑膠唱盤相當受歡迎，今次的 TN-300 算是入門型號，不過都齊晒基本功能，包括支援 33 1/3、45 rpm 兩種轉速，採用帶動式鋁合金壓鑄轉盤、鋁製直唱臂。本身設有 Phono 輸出，也內置了 Phono 放大，可以通過 RCA 直駁普通音響器材。另外機背設有 USB 端子，可以接駁電腦轉錄黑膠。TN-300 有櫻桃色、橡木色、黑色、白色及紅色 5 種機身顏色選擇，可以話復古得來又夠晒「潮」。

音樂播放測試：音場更闊動態更強　播黑膠幾有味道

今次 Blue Aura V40 比起上次試的 V32，其實少了 Phono 輸入，只設有 RCA，不過「配套」的 TEAC TN-300 本身就內置了 Phono 放大，兩部機直駁就可以，加上 V40 的 USB DAC、藍牙輸入，係一個功能幾完整的套裝。而黑膠和藍牙播放也是今次主力測試的部分，V40 主機輸出功率大了，加上配套的 PS40 喇叭亦都更大隻，音效上比起之前試的 V32 的確有幾大提升。尤其音場方面更闊更立體，而且聲音更加有厚度，鼓聲等動態亦明顯更強，加上 12AU7 的調聲，呈現張學友的聲線既溫潤又有厚度，聽林憶蓮亦都呈現到那種甜美和溫柔，相當順滑而有質感，分析力未至於極高，不過樂器都算細緻，定位亦都準確，係一套聽黑膠幾有味道幾舒服的組合。

聽得呢套「組合」，相信 3.5mm audio 和 USB 輸入都相對較少人用，今次就試埋藍牙播歌的效果。由於支援 aptX 編碼，所以實際上無線播歌的時候分析力不錯，有時甚至比聽黑膠更細緻少少。同樣保持了較為溫潤的音色，不過人聲和樂器的質感就稍稍及不上播黑膠時較有厚度、更為暖聲的感覺。另外，上次試 V32 的時候覺得音量稍稍不足，只適合細空間使用。今次 V40 的音量就有相當大提升，普通客廳使用都相當夠聲。配套設有低音反射孔的 PS40 喇叭低頻量感亦都幾足夠，基本上不太需要外接超低音喇叭。

總結：易用、多功能、有音樂味

Blue Aura V40 + TEAC TN-300 這套「黑膠 × 膽機」組合好易玩，而且有齊藍牙、USB DAC、黑膠轉錄等功能，可以話係功能好齊全的入門套裝，而且夾埋一齊買有得減價之後就更加抵玩。音色有膽機的厚暖感覺，有音樂味之餘分析力也算不錯。V40 提升了輸出，加大了喇叭之後音量足夠在客廳使用，幾適合初玩黑膠、膽機的用家，係一個易駁易玩、音質不錯而且設計好有型的配搭。

Specifications
V40、PS40
功率：30W × 2
頻率響應：23Hz - 100kHz（主機）；45Hz - 20kHz（喇叭）
訊源輸入：RCA、Micro USB（DAC）、3.5mm audio、藍牙 4.0 aptX
輸出：超低音
體積：148 × 264 × 215mm（主機）；245 × 145 × 205mm（每隻喇叭）
重量：3.5kg（主機）；3.5kg（每隻喇叭）

TN-300
輸出：Phono、RCA、USB
體積：420 × 180 × 340.5mm
重量：4.7kg

售價：$7,520（原價 $8,860）
查詢：大昌影音（2262 1173）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。