近年多了朋友玩返黑膠，對於初接觸黑膠的入門用家，如果想提升一下音質、又唔想成套換過個唱盤的話，換過隻好少少的唱頭放大器（Phono Amp）係一個唔錯的選擇。Cambridge Audio 推出的這款 Duo 唱放就同時支援 MM 同 MC 放大，仲內置耳擴、可以用耳機聽黑膠，而且價錢幾相宜，可以提升音質、又提供多一種玩法，今次就試下實際用落效果係點。

想了解咩係唱放、咩係 MM / MC 放大的朋友，可以參考下 SPILL 專題《從零開始學玩黑膠》。

內置耳擴無須喇叭聽黑膠

比起 CD 機、串流播放器等訊源，黑膠唱盤由唱頭產生的訊號太過微弱，需要進一步放大先至可以銜接到普通功放系統。現時唔少入門唱盤甚至 AV 合併機都內置了唱頭放大，不過這類內置的入門唱放通常效果一般。想有更好的播放效果，又不想大費周章成套升級的話，可以選擇配搭一個 Cambridge Audio Duo 這類獨立唱放。Cambridge Audio 另外仲有推出一款 Solo 唱放（$1,400），只支援 MM（動磁式）放大，而 Duo 就同時支援 MM 及 MC（動圈式）輸入。Duo 除了 RCA 輸出之外，另外仲內置了耳擴功能，設有音量調節及 6.3mm 端子可以連接耳機聽歌，這個設計幾有趣，讓用家可以無須連接擴音機同喇叭就聽到黑膠，今次都會試一下效果。

小巧機身　緊湊高質

Duo 採用了最新的開關式電源供應器，以及表面貼裝技術（Surface Mount Technology），令到機身設計可以更加緊湊小巧，就算擺書檯都可以，更加適合配搭耳機聽歌這種使用方式。另外，由於盡量縮短了電路板內部使用的訊號路徑，保證了更快的反應速度同埋更高的精確度，以及降低了背景噪音水平，可以避免嗡嗡聲和噪聲，減少對黑膠微妙的低電平訊號的影響。而通過特定的開關式電源處理，Duo 可以用到更小的變壓器，能保持簡約的設計同時提高輸出功率。如果放大器停止使用 20 分鐘，Duo 就會自動切換至待機狀態，令耗電低於 0.5W，長駁住備用聽歌都可以。

音質測試：分析力提升明顯　耳機輸出更勝一籌

相比起唱盤直出，用了 Duo 做唱放之後的提升都幾明顯。入門唱盤內置的唱放輸出聽落總係有少少朦，當駁上 Duo 之後，首先係分析力變得更加好，結他、鋼琴出返應有的質感。另外人聲結像亦都實淨一點，無論係張學友比較磁性有厚度的男聲，定係王菲比較有個性的女聲，都還原得唔錯。

測試器材：

黑膠唱盤：TEAC TN-400BT
唱放、耳擴：Cambridge Audio Duo
擴音機：Cambridge Audio CXA80
喇叭：Cambridge Audio SX-80
耳機：Shure SRH1840

Duo 比較特別係可以駁埋耳機，今次就用了 Shure SRH1840 罩耳式同 Campfire Audio Polaris 入耳式耳機兩款來試。Duo 的耳擴部分推力不算十分強，駁 SRH1840 要用到 8、9 成輸出先有足夠音量。不過整體分析力同動態都唔錯，尤其鼓聲動態做得幾好，整體表現甚至比起 RCA 輸出再好一點。駁 Polaris 就只需要 5、6 成音量就可以，因為 Polaris 本身音色偏中性，駁 Duo 聽黑膠都幾保留到音樂味，尤其聽《顧家輝音樂名作》，弦樂的厚度同質感都有呈現出來，飽滿得來聽落幾舒服，幾有「黑膠味」。

總結：價錢唔貴的升級小補品

黑膠入門用家玩了一段時間之後想升級的話，除了換唱盤之外，利用一些小補品來提升音質係比較合乎成本效益的選擇。今次 Cambridge Audio Duo 除了提供比起內置 Phono Amp 更好音質之外，亦都多了駁耳機的玩法，最重要係價錢亦都唔貴，尤其適合有玩黑膠又有用開耳機的朋友。

Specifications
Duo
支援唱頭：MM、MC
增益（1kHz）：39dB（MM）、60dB（MC）
額定輸出：300mV
靈敏度：3.35mV（MM）、305uV（MC）
輸入阻抗：47kΩ（MM）、100 Ω（MC）
體積：48 × 215 × 159 mm
重量：0.95kg
售價：$2,400
查詢：Cambridge Audio（2882 4000）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。