3D：電影畫面由平面走向立體

2016年07月29日
熾

相信各種戲院「特效」入面，大家對「3D」最熟悉。近年幾乎逢大片必有 3D 版，甚至經常出現同一套戲，3D 版放映的場次比 2D 版更多，大家要「硬食」貴戲飛的情況。3D 電影係咪比較好？未必，不過相信會繼續是特技、科幻、動作、動畫等電影常用的拍攝和放映技術。

同 3D 相片一樣，3D「電影」的概念早於 18 世紀末就已經有，兩百年來由左右分隔畫面、紅藍鏡片到現時的偏光眼鏡，發展成相當成熟的 3D 放映技術。雖然五十年代、七八十年代都曾有過 3D 熱潮，不過同 2009 年相比就可謂小巫見大巫。因為有《阿凡達》這套當年風靡全球的 3D 大片，令之後 3D 電影的發展一日千里，所以都有唔少人將《阿凡達》上映之後的 2010 年叫做「3D 元年」。

1983 年的 3D 版《大白鯊3》曾經轟動一時，放映一個星期就有成 1,300 萬美元票房，不過實際 3D 效果並不出色，電影本身亦乏善可陳。

2004 年的《北極快車》是首套 IMAX 3D 電影，當年香港 UA IMAX 亦有上映，由於又 3D 又 IMAX 所以票價相當貴，全球 75 個 IMAX screen 上映但就已經佔票房三成。

現時香港的戲院基本上都裝設了 3D 放映系統，最常採用的是 RealD 3D 技術，大家入戲院睇 3D 戲戴的被動式 3D 眼鏡上可能都印有「Real D」的字樣。3D 電影推廣初期，戲院都會送入場觀眾 3D 眼鏡，不過大約一年之後、3D 電影開始有一定的普及，大部分院線就開始實行觀眾自攜 3D 眼鏡的做法。唔記得帶？可以到戲院小食部之類即場買，每副十蚊、八蚊不等。現時除了 IMAX 或者部分「尊貴影院」之外，睇 3D 戲基本上都要記得帶 3D 眼鏡。

相信大家對 RealD 3D 呢隻「吉祥物」狗仔都不會陌生，睇戲前的 trailer 成日都會見到佢，亦都係提示大家戴起 3D 眼鏡。

初期戲院有送 3D 眼鏡，不過近年除了 IMAX 等少數戲院之外，大部分已經變成自攜眼鏡睇 3D 戲。

ReaD 3D 技術用偏振光來產生立體影像，戲院的兩部投影機會以 144fps 的速度交替投影左右畫面，投影機前面則以 ZScreen 推挽式光電液晶調變器將投影出來的光線、將右畫面變成順時針圓偏光、左畫面則是逆時針。大家手頭上的 RealD 3D 眼鏡左右兩塊偏光鏡就對應左右畫面的順逆偏光，於是左眼睇到左畫面、右眼右畫面，從而獲得立體影像。偏光鏡的成本低，加上 RealD 3D 傾斜觀看也不會有重影和變暗的情況，相當適合戲院，因此亦成為了主流。