投影機市場近年都開始向 4K 解像度發展，不過相比起電視的全面普及，投影機市場相對較細，所以 4K 產品推出相對較慢，價錢亦都偏貴。今次測試的 UHD50 就是 Optoma 最新推出的入門 4K 投影機，採用了新一代的 TI（德州儀器）4K DLP 投影晶片，成本進一步降低，街價只需要 $15,000 有找，而且已經支援埋 HDR，規格方面幾吸引，至於實際畫質表現，下面就同大家測試一下。

配備新 DLP 4K 投影晶片　雙 HDMI 2.0 兼容更好

相比起上年推出、售價大約 $20,000 的 UHD60，今次 UHD50 採用了新一代的 TI 4K DLP 晶片 TRP S450，尺寸細一點（0.47 吋 VS 0.66 吋）。新設計的晶片原生具備了 1,920 × 1,080 解像度，通過 XPR 技術以 4 次 Pixel Shift 像素位移方式獲得真正 4K 的 3,480 × 2,160（約 800 萬像素）解像度。不過可能因為晶片縮細了，因此在同樣 240W 的光源之下，輸出亮度由 3,000 流明稍稍下降到 2,400 流明，至於實際影響係點，稍後在畫質測試部分再同大家分享一下。UHD50 同樣已經支援 HDR，而且相比起 UHD60 得 1 組 HDMI 支援，UHD50 機身的兩組 HDMI 均為 2.0 版本，支援 HDCP 2.2、4K HDR，器材接駁上兼容性更加好。

選單及設定：詳盡清晰　HDR 選項多

UHD50 的選單、功能同 UHD60 基本上差不多，分類幾清晰，HDR、顏色修正以及畫面增強的相關設定亦都好齊全。主要在顯示模式方面提供了更多的預設選擇，令用家更加容易調校到理想畫面。

畫質測試：自然細緻解像力一流

今次阿熾係上 AV Hospital 院長度試機，開機已經係播緊《薩利機長：迫降奇蹟》，雖然係一套劇情片，不過試機位其實都好多，所以第一套就直接用佢試。《薩利機長》UHD Blu-ray 入面有好多主角近鏡，UHD50 呈現到的細緻度可以話一流，同之前測試的 UHD60 基本上沒有太大分別，同原生 4K 投影可能爭少少，不過如果不是直接 A/B 比較的話，UHD50 的解像力已經好驚人，皮膚的紋理同細節都完全清晰可見，直程連「UltraDetail」功能都無需開啟。（UltraDetail 就算開到 1 格都已經幾有效果，對比會強一點，畫面線條和細節亦都變得更明顯，但就會令人覺得有點粗糙，反而關閉之下畫面更自然細緻。）

測試器材：

播放機：OPPO UDP-203
投影機：Optoma UHD50
線材：FreeGift 4K FIBBR 4K 光纖線

色彩表現：BrilliantColor 好實用　膚色輕微偏紅

之後再試《皇家特工：金圈子》，幾場動作畫面流暢度都唔錯，由於投影機本身並未內置任何流暢度加強技術，所以全部係靠原生顯示來呈現。一些中慢速的 pan 鏡會有輕微的窒格，不過就無過多殘影影響觀看，保留到電影 24Hz 的感覺。顏色方面還原度算是不錯，只是膚色有輕微偏紅，可以通過色彩管理部分作微調修正。值得一提的是，Optoma 的 BrilliantColor 功能幾好用，通常阿熾都會建議將這些畫面增強功能關閉，不過 BrilliantColor 是一個例外。甚至可以開到 6 - 10 的程度都仍可接受，畫面色彩會變得更鮮艷之餘，仍能保持較為自然。

亮度及對比度：光暗過渡自然細節豐富　黑位稍稍不夠深沉

最後再用新鮮到手的《正義聯盟》UHD Blu-ray 試下，中段齊人集結救人一幕，幾次閃電俠帶起的閃電亮度對比效果都幾出色，光暗突變的反應好快，而且亮度幾足夠。規格上 2,400 的亮度比起 UHD60 的 3,000 流明差一點，實際上試最強光度的確會爭少少，不過阿熾一向都唔太鍾意 HDR 亮度過高的畫面、太過刺眼，UHD50 就做到一定 HDR 效果，但係望落都夠舒服自然。不過相對上遮光就要做得好一點，本身 DLP 技術在暗位上就不易做到好深沉的黑色，UHD50 的黑位都稍稍不夠沉實，不過好在《正義聯盟》較為暗黑風格的畫面細節層次都保留得幾唔錯。

總結：入門級價錢但表現好有水準

採用了新一代的 4K DLP 投影晶片，UHD50 在畫面解像力方面保持到相當出色的水準，同時令成本進一步下降，萬五蚊有找的價錢的確相當抵玩，好適合想試吓 4K 投影的朋友。畫面調校功能幾全面、HDR 設定及畫面模式選擇豐富，黑位稍為唔夠實淨以及亮度未至於十分高，不過整體對比度、光暗層次細節都呈現得幾好。阿熾對 DLP 的彩虹效應比較敏感，今次試 UHD50 都只係睇到少少，相信對大部分用家來講都問題不大。

Speicifcations
投影晶片：0.47 吋 TRP S450 4K UHD DMD DLP（by Texas Instruments）
解像度：3,840 × 2,160（UHD）
亮度：2,400 流明
對比度：500,000:1（Dynamic Black）
鏡頭變焦：1.3 ×（光學）、0.8 - 2.0 ×（數碼）
投影尺寸：34.1 吋 - 302.4 吋（直佳 34.1 吋 - 140 吋）
Lens Shift：15%（垂直）
輸入端子：HDMI 2.0 × 2、VGA、3.5mm audio
輸出端子：3.5mm audio、光纖
內置喇叭：5W × 2
重量：5.34 kg
體積：391 × 130 × 282 mm
售價：$14,990（3 月底前預訂送 2 米 FIBBR 4K 光纖線一條，價值 HK$1,100）
查詢：AV Hospital（2697 8088）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。