Pioneer UDP-LX500 剛公佈的時候已經有傳高階機款 UDP-LX800 會在稍後推出，估唔到新機真係咁快就正式到港，一心想等旗艦機升級的朋友唔使等好耐。之前 UDP-LX500 的聲畫效果其實已經好唔錯，究竟更高階的 UDP-LX800 在設計、用料、聲畫表現方面可以有點樣的提升？

搭載旗艦 PD-70AE 技術、設計用料升級

外形方面 UDP-LX800 同 UDP-LX500 可以話係一脈相承，不過前者望落有更強的「工業風」，而這部高階機亦的確明顯更加重身紮實，這些也反映在機身的用料同設計上面，主要的升級包括了：

• 改用兩組 8 聲道 SABRE ES9026PRO DAC
• 搭載旗艦 SACD 機 PD-70AE 技術、改善模擬音訊線路設計
• 加入 XLR 平衡輸出
• 機身左右採用鋁材側板
• 獨立實心鋼製頂蓋、拆機時拎上手都覺得好重身
• 大型火牛供電及定制高質電容
• 火牛屏蔽蓋及電源線路外殼加上抑振塗層
• 電源及電路屏蔽罩加入壓印標記，可吸收電磁波及消除駐波

機身同 UDP-LX500 一樣繼續為無散熱孔設計，可以避免內部碟盤高速轉動時的噪音傳出，主線路板繼續採用 6 層 IVH（內導通孔）設計來消除數碼噪音。同樣採用了蜂巢狀碟盤外殼，不過就加上了抑振塗層。同樣分為供電、讀碟/數碼處理、模擬處理 3 大區域，不過區隔更明顯、互相干擾更少，由拆機相就可以睇到明顯分別。總括來講係 UDP-LX500 原有的基本上都有齊、或者升級，亦都加入了旗艦機的硬件及設計。

新增「純轉盤」模式

UDP-LX500 設有「純模擬音頻直接輸出」模式（Direct），將視訊及數碼處理電路關閉，作為純唱盤使用。UDP-LX800 一樣配備了這個模式，此外比較特別係今次加入了「純轉盤」模式（Transport），關閉模擬音頻電路，只啟用數碼處理部分來提升播碟時的聲畫質素。至於功能方面就大致相同，一樣支援 UHD Blu-ray、Blu-ray、DVD、CD 以及 SACD 播放。兼容 4K 影像、支援 HDR10 以及 Dolby Vision 的 HDR 格式，提供了 HDR → SDR 的轉換功能。內置了 4K 增線，機身配備的手動影像調節亦都好全面，音效方面亦都有不同 filter 設置。機背設有雙 HDMI 輸出，配備自家的 PQLS（精準石英鎖定系統），配合兼容的擴音機使用就可減少 jitter，提供更準確的音訊還原。

影碟播放測試：對比更強更立體　音效細節更豐富

今次雖然主力係試 UDP-LX800，不過都想同 UDP-LX500 比較一下，睇吓有幾大分別，所以即場用兩部機 A/B 比較地播碟試玩。第一個印象係 UDP-LX800 的畫面亮度、整體對比都更高，睇《盜墓者羅拉》打開古墓一段，夕照下背光的效果明顯更強、對比效果更好，同時側光之下皮膚、髮絲的光位及暗位細節都再多一點。而另一個幾明顯分別就是，UDP-LX800 的畫面更立體，一些羅拉的半身鏡頭可以見到人物更加突出，前景後景的距離同深度都更明顯。這要歸功於在畫面處理時更大的動態以及更精細的光暗層次分佈，令影像立體感更突出。其實單睇 UDP-LX500 的畫面已經覺得好唔錯，甚至分開獨立睇兩部機的輸出，可能察覺不到這麼大的差異，不過一旦擺埋一齊即時比較的話，普通用家都可以察覺到畫質的提升。

測試器材

UHD Blu-ray 機：UDP-LX800
AV 擴音機：Pioneer SC-LX901
投影機：JVC DLA-X7900
7.1.4 聲道喇叭：JBL Array 1400（前置）、JBL Control X（環繞）、JBL Array 1500（超低音）、（天花）

之後再用《死侍 2》試吓效果，劫囚車一段其實音效幾混亂，UDP-LX800 和 UDP-LX500 比較之下，跳傘以及追車時的天空聲效以及周圍環境聲都明顯更開揚，而且細節更豐富一點，風聲、車聲、人聲等結合，令整個音場還原得更完整，而某些引擎聲、子彈聲的方向感亦更明確。除了音場闊一點之外，死侍同機堡打鬥時的拳腳碰撞聲質感亦都更實在，可以更明顯地呈現到那種衝擊力，而打鬥或者撞車時那種擴散出去的低頻空氣感亦更強。

音樂播放測試：分析力提升、人聲更通透

最後再用 Direct 模式試一試音樂播放表現，UDP-LX800 的分析力十分出色，一開聲已經可以聽到幾明顯的分別。由中高音的一些鋼琴演奏到 bass 及鼓聲的低頻，都重現到樂器原有的質感，而且做到相當好的定位。唯一係 JBL Array 1400 本身低頻會稍多，會有輕微焗聲，稍稍削弱了細緻度。不過中高音的表現就相當不錯，尤其人聲結像好清晰。聽陳綺貞演唱會時觀眾的歡呼聲，以及本身演唱的立體感都相當好。尤其呈現陳綺貞的女聲時好通透，雖然號角高音會稍為飇了一點點，不過那種空靈的聲線穿透力同感染力都相當強。

總結：售價同樣進取　較適合進階用家

之前 UDP-LX500 在香港發售的時候比起日本定價平一大截，吸引了唔少外地用家來港搶購。今次 UDP-LX800 同樣好進取，亦都係以「6、7 折」的定價發售，不過依然比 UDP-LX500 貴一倍有多。對普通用家來說 UDP-LX500 係性價比相當高的選擇，由功能以至聲畫質素都好唔錯。而拼埋「大哥」UDP-LX800 比較的話，後者又的確有優勢，畫面更立體細緻，聲效亦都更通透清晰，A/B 比較的話差別係幾明顯，由用料、設計，以至新增的 Transport 模、XLR 平衡輸出等等，係「抵畀」多一倍的價錢。如果屋企已經用緊大尺寸 4K 電視，甚至用緊投影，或者想用影碟機兼任埋 CD 唱盤的話，UDP-LX800 無疑係更好的選擇。

Specifications
UDP-LX800
支援光碟：UHD Blu-ray、DVD、SACD、CD 等
端子：HDMI × 2、同軸、光纖、XLR、RCA、USB × 2、LAN
體積：435 × 131 × 339 mm
重量：13.8 kg
售價：$14,980
查詢：POMA（2429 8148）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。