Polk 這個美國品牌一向最出名係性價比高，今次在香港推出的 MagniFi Mini 小型 Soundbar，雖然主機好小巧，不過配合薄身的無線超低音，能量十分充足。而且二千幾蚊的 Soundbar 組合就已經具備 Chromecast 的網絡串流功能，同價位好少見。

小巧主機內藏 6 單元

Polk Audio 來自美國，1971 年由 Matthew Polk 與幾位熱愛音樂和電子工程的朋友一齊創立，已經有四十幾年歷史。產品以入門和中階影音器材為主，阿熾以往試過的 Polk 喇叭都係平價高質，屬高性價比之選。今次 MagniFi Mini 的 Soundbar 主機真係好「Mini」，尺寸同大家平時見開的 iPod、iPhone 藍牙喇叭差不多，不過就已經內藏了 4 組 2.25 吋中音同 2 組半吋高音單元，配備了 150W 輸出。而配套的超低音喇叭就係無線設計，配備了 6.5 吋低音單元，一駁電開機就識得自動連接，無需額外設定，使用上好方便。而且打直擺放的薄身設計，配合小型 Soundbar 主機，特別適合空間有限的用家，擺廳或者擺房使用都好適合。

藍牙、Wi-Fi、Chromecast 及 HDMI（ARC）有齊

通常入門 Soundbar 支援的輸入選擇都比較少，今次 MagniFi Mini 比較特別係二千幾蚊價位但已經內置 2.4GHz/5GHz 雙頻 Wi-Fi 及支援網絡串流功能，可以通過 Chromcast 無線播歌。雖然無內置 AirPlay，不過 iPhone 用家都可以通過藍牙播放音樂，聽歌都好方便。機背設有 HDMI、支援 ARC，可以直駁電視輸出音效，另外仲有光纖同 3.5mm audio 輸入，額外駁多兩樣器材，甚至駁電腦使用都可以，阿熾就覺得 MagniFi Mini 主機真係幾慳位，擺電腦檯用幾 fit。Soundbar 設有電影、音樂、運動等幾種預設音效模式，嚟緊世界盃用運動 mode 睇波應該幾正，另外仲配備 Voice Adjust 技術可以獨立調節人聲音量。

音效測試：估唔到咁爆得

今次測試的時候，電視不支援 ARC 功能，所以就由 Xbox One S 以光纖連接到 MagniFi Mini 出聲，HDMI 連接電視出畫面，Soundbar 本身支援比較多輸入的話連接上的確比較靈活，配合舊有器材使用都無問題。先用《Gears of War 4》試吓打機效果，估唔到 MagniFi Mini 咁爆得，槍聲、爆炸等等音效能量好強。好多小型 Soundbar 可能只係應付到 50 呎、100 呎以內的空間，但係 MagniFi Mini 的音量用在 200 呎甚至再大一點的地方仍然夠力，係幾大的驚喜，用來打機效果一流。

之後再用《死侍》試埋睇戲效果，初段槍戰同撞車的音效表現都幾好，獨立的無線超低音包圍感出色，亦都係 Polk Audio 一貫的風格，低頻量感充足、飽滿有力。音場未至於好闊，不過左右聲道的立體感都夠明顯，子彈、追逐等都有一定的方向感，以小型 Soundbar 來說可以做到這樣的效果，幾令人滿意。值得一提係，MagniFi Mini 本身的人聲幾清晰、還原度亦都夠好，死侍在槍林彈雨之下的「獨白」依然夠清夠突出。另外 Voice Adjust 的效果好明顯，如果日後遇著某些戲想推高一點人聲，或者睇波想旁述再大聲一點，可以用這個功能輕易做到。

總結：同價位最細、功能最齊最爆得

普通電視音量輸出有限，打機、睇戲單靠內置喇叭有時唔夠過癮，MagniFi Mini 以咁小巧的體型，可以有咁爆得的音量，以及相當唔錯的音質，幾有驚喜。特別係二千幾蚊的價錢，各種接駁都齊全，而且有埋藍牙同 Wi-Fi，功能都幾齊全。Soundbar 主機夠慳位，擺廳、擺房甚至擺電腦檯使用都好適合，用來打機、睇戲、睇波、聽歌都啱，試完機之後阿熾自己都幾想擺隻 MagniFi Mini 响 office，配埋個 27 吋大 mon，整個私人小型影院睇片打機，諗起都覺得的確係幾爽。

Specifications
MagniFi Mini
支援音效：Dolby Digital、DTS 等
無線連接：藍牙：Wi-Fi（2.4GHz/5GHz）
輸入端子：HDMI（ARC）、光纖、3.5mm audio
體積：81.3 × 340 × 109 mm（Soundbar）、366 × 188 × 366 mm（超低音）
重量：1.76kg（Soundbar）、3.68kg（超低音）
售價：$2,680
查詢：Sound United HK（3900 0120）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。