Polk Audio 推出的 MagniFi Max Soundbar 之前同大家試過，低音相當爆得，加上幾準確的定位同廣闊的音場，可以大大提升電視音效，睇戲、煲劇同打機的效果都好唔錯。不過 Soundbar 始終主要提供「前半場」的音效，今次 MagniFi Max 其實仲有一個配備無線後置喇叭 SR1 的套裝，既可以享受到 Soundbar 的接駁方便，又可以享受到完整 5.1 環繞聲效，今次就試吓加入了 SR1 之後可以有幾唔同。

MagniFi Max 上次同大家介紹過，最特別之處是支援自家的 SDA 技術，提升環繞聲效果；內置 Voice Adjust 功能，可以獨立調節人聲輸出，睇戲、睇電視都好有用。Soundbar 主機配備了 4 組 1 × 3 吋中低音、2 組 0.75 吋高音，以及 1 組獨立的 1 吋中音單元，分工仔細，有助提升音場細節同定位。配套的無線超低音就配備了 8 吋單元，提供達 160W 輸出（總輸出為 340W）。支援藍牙及雙頻 Wi-Fi、內置 Chromecast 功能，可以方便手機串流播歌。另外 Soundbar 本身亦設有 3 入 1 出的 HDMI 2.0a 端子，支援 4K HDR 視訊的 pass-through，連 Dolby Vision 都可以兼容到，加上光纖以及 3.5mm audio 輸入，可以作為一個功能同接駁都幾全面的影音中樞。

MagniFi Max SR 就是在 Soundbar + 無線超低音的「3.1」套裝之上，再加上兩組無線的 SR1 後置喇叭。Soundbar 主機及其他喇叭只要接駁好電源，開機之後就識得自動連接，或者按下 SYNC 鍵作手動連接，組成完整的 5.1 聲道系統，無需特別的設定。後置的 SR1 本身亦都幾小巧，無論是掛牆擺放或者利用附設的腳架孔安裝都方便。

音效測試：補足「後半場」音效　方向感更準確立體

《引力邊緣》係阿熾好鍾意用來試機的一套電影，空間感好正，今次加入 SR1 補足了後面應有的聲效。電影入面好多後方的人聲、碰撞聲，單靠前置的 Soundbar 基本上呈現唔到，都會變成少少側面發聲。今次有了無線後置，一些後方的人聲定位都做得相當準確，而衛星殘骸飛過的方向感就好明顯，尤其 SR1 的音效擴散性不錯，令前面的 Soundbar 同後面的 SR1 之間依然做到相當好的連貫性，令到宇宙空間的成個音場呈現得幾完整，加埋獨立超低音輸出都夠強，整體包圍感比起只有 Soundbar 時的提升確實幾明顯。

值得一提的是，雖然不設收音咪作調聲，不過 SR1 其實可以通過遙控器獨立調校左、右置聲道的輸出。有時因為擺位所限，左邊的 SR1 放遠少少、右邊擺近少少，通過遙控都可以好方便地增減輸出來平衡返。另外如果覺得後置的輸出太多或者不足，亦都可以輕易通過遙控來調整。今次試機其實都只係直接將 SR1 一邊放在梳化上、一邊放在高腳櫈上面，試播《死侍 2》劫獄一段，配合遙控器好容易就調節到幾平衡同連貫的音效。另外 SR1 的電源接線都相當長，所以就算喇叭本身放得離電插座比較遠，駁電方面問題都不大。

總結：簡易安裝的完整 5.1 體驗

MagniFi Max 本身就是一套表現相當不錯的 Soundbar 系統，低頻爆發力同控制力不錯、長身 Soundbar 同多單元設計呈現到幾立體的環繞聲。加入 SR1 補足了後方的聲效，令整個音場更完整、方向感同定位更立體準確，加上本身 SR1 相當輕巧同容易安裝，左、中、右聲就由 MagniFi Max soundbar 包辦，無需複雜接駁，後置聲效亦都可以通過遙控方便調校，可以話係其中一個最簡便又好聲的 5.1 環繞聲方案。

Specifications
MagniFi Max SR
支援音效：Dolby Digital、DTS 等
無線連接：藍牙：Wi-Fi（2.4GHz/5GHz）
輸入端子：HDMI × 3、光纖、3.5mm audio
輸出端子：HDMI
體積：1,092 × 96 × 53.1 mm（Soundbar）、369 × 371 × 307.6 mm（超低音）、161 × 342 × 263 mm（SR1）
重量：2.74kg（Soundbar）、6.12kg（超低音）
售價：$5,980（MagniFi Max SR）、$4,980（MagniFi Max）、$1,480（一對 SR1）
查詢：Sound United HK（3900 0120）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。