手機喇叭聽歌不夠聲、普通藍牙喇叭通常又比較大隻，帶出街使用不夠輕便，所以就有 SRS-XB10 這類相當小型、但音量都算幾夠的「藍牙喇叭仔」出現。其實 Sony 一直都有推出不同類型的藍牙喇叭，今次 SRS-XB10 有防水濺功能、又可以配對做兩聲道喇叭聽歌，功能幾齊全實用，至於實際聽歌效果係點？即刻同大家試下。

EXTRA BASS 小喇叭有強勁低音

SRS-XB10 屬於 Sony 新的 EXTRA BASS 系列，顧名思義就是「更多的低音」，由於體型所限，喇叭內只設有一組 46mm 全音域單元置於頂部，不過底部就有一隻被動式單元，可以加強低音輸出。除了藍牙 4.2 連接之外，喇叭亦設有 3.5mm 輸入，方便連接一些不支援藍牙的手提裝置出聲。內置充電池可使用約 16 小時，以 Micro USB 連接充電，實際用落、在大音量之下都有約 10 小時電量，平時用幾日都足夠。

即時搭套兩聲道

同之前的 SRS-X11 類似，今次都可以將兩隻 SRS-XB10 配對一齊用，可用來增加音量，又或者分別輸出左右聲道、變成一對超小型 2.0 喇叭。機身附帶掛環，除了方便我掛在背囊、單車等帶出街之外，掛環亦可以變做一個「底座」，將喇叭變做前向擺放，臨時搭做一對桌面喇叭用都得。SRS-XB10 支援 NFC 作藍牙配對，內置收音咪可作電話免提，此外亦支援 IPX5 防水濺設計，使用上也相當方便。

音效實測：單個使用夠大聲、一對使用夠包圍

今次測試借齊了一對 SRS-XB10，單個喇叭用的話音量都算足夠，因為 SRS-XB10 在小型藍牙喇叭入面算是稍大，大約一百呎的空間都可以應付到。最大音量之下都無拆聲的情況，不過分析力會有所下降，尤其低音會變得較為焗聲。正常音量之下，低音相當足夠，中高音分析力亦不錯，在小型藍牙喇叭當中表現算是幾出色。

而配做一對兩聲道喇叭使用的話，效果更加出奇地好，做到少少人聲結像同樂器定位，雖然未至於超立體，不過都有少少真正兩聲道效果。如果兩隻都垂直擺的話，低音包圍感相當好，尤其擺電腦檯前面用的話，睇戲、聽歌的音效都好似在兩邊包住自己一樣；如果利用掛環將喇叭向前擺的話，低音會減弱少少，不過中、高音就會清晰一點。

總結：一隻用幾好、兩隻效果更好

SRS-XB10 大概是一隻小水杯的大細，算是可以日常隨身擺手袋、背囊攜帶。以小喇叭來說音量幾夠大，音質在小型藍牙喇叭入面算中上，而無論音量增強，或者左右聲道配對的模式，都可以令到兩隻 SRS-XB10 的音效有幾大提升。雖然長期插住 Micro USB 供電不太實際，所以不太適合作為小型的桌面喇叭，不過臨時用來做兩聲道聽歌，效果都幾過癮。而且今代比起之前的 SRS-X11 仲平少少，買兩隻來用成本都唔算高。

售價：$540
查詢：Sony（2345 2966）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。