近年愈來愈多朋友玩耳機，連帶周邊器材都愈來愈受歡迎，TEAC 之前推出的 UD-503 就是其中一款好受用家喜愛的 USB 解碼連耳擴。今次新推出的 UD-505 改用了全新的解碼晶片，支援 32bit/768kHz 及 DSD 22.6MHz 音訊，並且加入了新興的 4.4mm 平衡端子，可以話係一次幾全面的升級，不過價錢亦都比上代 UD-503 初推出時貴了一點，究竟用家應該點揀？今次就同大家詳細測試同比較一下。
近年愈來愈多朋友玩耳機，連帶周邊器材都愈來愈受歡迎，TEAC 之前推出的 UD-503 就是其中一款好受用家喜愛的 USB 解碼連耳擴。今次新推出的 UD-505 改用了全新的解碼晶片，支援 32bit/768kHz 及 DSD 22.6MHz 音訊，並且加入了新興的 4.4mm 平衡端子，可以話係一次幾全面的升級，不過價錢亦都比上代 UD-503 初推出時貴了一點，究竟用家應該點揀？今次就同大家詳細測試同比較一下。
上代的 UD-503 解碼能力已經不錯，今次 UD-505 再有提升，配備了全新的 AKM 高階 DAC VERITA AK4497，支援 PCM 32bit/768kHz 及 DSD 22.6MHz（DSD512）解碼，可以話係現時民用機入面最頂級的規格，足以應付大家手頭上不同格式的音樂。另外，左右聲道都各設一組解碼晶片、採用雙單聲道設計，可以有效提升訊噪表現。模擬部分採用了自家 TEAC-HCLD（High Current Line Driver）輸出緩衝電路，以 4 電路並行的驅動方式提供更強的供電瞬變、更寬廣的音樂動態。同上代一樣，UD-505 都支援升頻功能，不過升頻能力亦都再提高至 24.5MHz DSD 及 32bit/384kHz PCM，實試效果都幾明顯，下面測試部分會同大家詳細分享下。
外形設計方面，UD-505 同上代 UD-503 其實好似，有純黑同純銀 2 種顏色機身選擇。今次借到手測試的是黑色版，機身好有金屬質感，撥杆式開關加埋旋鈕設計有少少古典味，望落係幾靚仔。設計上最大的分別，是兩組 6.3mm 耳機端子中間多了一組 4.4mm 端子，支援新一代的 4.4mm 5 極插頭的平衡耳機。耳擴部分的驅動力達到 700mW（平衡@32Ω）/ 500mW（非平衡@32Ω），可以支援 16Ω - 600Ω 阻抗的耳機。除了作為 USB DAC 之外，機身亦設有光纖、同軸以及 RCA 輸入，作為解碼或者前級使用都可以；另外都設有 RCA 同 XLR 輸出，近年幾流行用主動式監聽喇叭，直駁就聽得歌。而且仲新增了藍牙功能，對應 LDAC 同 aptX-HD 兩種高質素藍牙串流方式，有線、無線連接都幾全面。
音樂播放部分以 Surface Pro 4 連接 UD-505 作 USB 解碼輸出，以 foobar2000 及 TEAC HR Audio Player 作為播放器。播 PCM 音樂的話無須裝軟件都可以，DSD 的話就要裝返原廠的驅動程式。耳機方面用了好幾款配合來試，包括 Shure SRH1840、Campfire Audio Polaris 以及 Sony MDR-Z1R。因為現時市面上 4.4mm 平衡耳機選擇仲係比較少，而 Z1R 價位上都同 UD-505 算係配搭到，所以都主力用 Z1R 來試吓平衡輸出的效果，同比較一下與非平衡輸出的分別。
電腦：Microsoft Surface Pro 4
USB DAC + 耳擴：TEAC UD-505
耳機：Shure SRH1840、Campfire Audio Polaris、Sony MDR-Z1R
UD-503 都係阿熾幾鍾意的解碼連耳擴，功能、音質、音色都平衡得幾好，不過稍為厚暖的偏向有時會讓人覺得分析力及不上近年一些用到高規格新晶片的新機。今次 UD-505 一開聲、分析力不夠強的感覺就一掃而空，人聲和樂器都好細緻，而且分離度出色、層次好分明，尤其聽 24bit/96kHz 的 Hi-Res 檔案，林奕匡微帶磁性的男聲相當細緻自然，而且結像都好立體，唇齒聲的細節清晰。最重要是保持到原有的音樂味，鋼琴、結他等配樂都飽滿而有質感，音色雖然有少少不同，較為偏向中性，不過依然好有音樂感、夠舒服，係相當討好的音色。
升頻方面有 PCM 和 DSD 兩種選擇，個人就較為喜歡 PCM 升頻的效果。升頻之後聲音會順滑細緻少少，人聲和低音的輕微毛刺感會消除，不過 DSD 升頻的話音壓會稍稍下降。同原聲 A/B 比較之下，原聲能量感會強少少，不過亦都會顯得粗糙少少，大家可以視乎需要來選擇。
通常女聲會比較有好效果，聽石詠莉高音再甜美順滑一點，另外聽弦樂都唔錯。再細緻少少比較的話，DSD 升頻的低音會硬少少，但背景再靜一點；PCM 就保留到較多原聲的動態和厚度，同時提升到分析力及細緻度。至於幾種數碼濾波當中，阿熾自己鍾意爽快少少的聲底，Sharp roll off 或者 ShortDelay Sharp 的效果都好唔錯，值得一試。
UD-505 的驅動力好唔錯，兩款大耳牛 Shure SRH1840 和 Sony MDR-Z1R 都只需一半多少少的音量已推得好夠力。用 Z1R 插非平衡的 6.3mm 端子聽效果已經相當好，轉用 4.4 mm 平衡端子之後，提升竟然都仲係幾明顯，尤其是背景靜得好誇張，令到人聲同樂器分離度更高，輕敲鑼、鈸的聲音超清脆，而且鋼琴聲亦變得更通透。聽返林奕匡，人聲都通透立體幾多，分析力再升級，唇齒聲再細緻少少。整體感覺特別係低音會稍為緊湊少少，聽 Maroon 5〈One More Night〉前奏的低音超上腦。
今次 TEAC UD-505 的售價為 $9,980，比起上代 UD-503 初推出時大約 8 千蚊貴了一點，不過整體上由規格到音質提升都幾明顯，擁有後者的平衡度和音樂感，但分析力有頗大提升。加上引入了 4.4mm 5 極平衡端子，對日後新一代平衡耳機的兼容性有保證，而 UD-505 本身的平衡輸出表現亦相當一流，所以係一個幾物有所值的升級。
另外，而家 UD-503 其實都仲同步有售，比起之前定價當然再平一點；而 UD-505 之外，新一代機款仲有 NT-505，更強調網絡功能，比較適合直接用來播歌，不過價錢就再高少少要 $11,800。所以而家 TEAC Reference Series 5 的產品線都算好齊全，大家可以因應自己的預算和需要去選擇。而今次測試的 UD-505 就比較適合主要聽耳機、用電腦播歌的朋友。
Specifications
UD-505
支援解碼：最高 PCM 32bit/768kHz、DSD 22.6MHz（DSD512）
支援升頻：最高 PCM 32bit/384kHz、DSD 24.5MHz
耳擴輸出：700mW（平衡@32Ω）/ 500mW（非平衡@32Ω）
兼容耳機阻抗：16Ω - 600Ω
頻率響應：10Hz - 80kHz
訊噪比：>=110dB
輸入端子：USB Type-B（DAC）、光纖、同軸（前、後）、RCA、10MHz 時鐘
輸出端子：6.3mm 耳機 × 2、4.4mm 耳機、RCA、XLR
體積：290 × 84.5 × 248.7 mm
重量：4.2 kg
售價：$9,980
查詢：大昌影音（2262 1173）
請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。
