Bose 耳機一向有唔少 fans，所以早前公佈 SoundSport Free 呢對自家首款真無線運動藍牙耳機的時候，身邊不少朋友都討論得幾熱烈。阿熾作為 SoundSport「有線」藍牙耳機的用家，都好有興趣試吓呢對「真無線」耳機，究竟只係刪去接線咁簡單？音質有無再提升？使用的穩定性、續航力又係點？今次就用了一個月時間詳細測試一下。

設計與佩戴：體型較大但舒適穩固　劇烈運動都不怕鬆脫

大家無睇錯，今次試 SoundSport Free 的時間長達一個月，可算長時間使用報告，包括日常返放工、去健身室、落街跑步都戴住。SoundSport Free 的體型在真無線耳機當中都算比其他牌子偏大少少，主要是因為電量多了以及要容納新的天線設計加強接收，不過少了線材束縛之後，其實用落幾就手。StayHear+ 的設計、一放入耳仔再一扭，伸展翼會自然扣住耳殼，就算快跑、跳躍都無試過甩耳機的情況，最多都係鬆開少少，戴得好穩固，值得一讚。跟機會有大、中、小 3 個尺寸的耳塞提供，就算耳仔偏大、偏細都唔怕。

隔音能力：大約保留 2 成環境聲　幾適合街跑

SoundSport Free 的耳塞並不是全封閉式的入耳設計，稍稍扁身的入耳式耳塞令用家可以聽到大約 2 成的環境聲。雖然未能完全隔音，例如有時在較為嘈吵的路邊要稍為提高音量，不過對於運動耳機來說這個設計算是更為有利，始終出街跑步、健身室使用，可以聽到部分環境聲是更加安全一點。

Bose Connect 手機 App 的設定

使用時間與穩定性：一次充電可用 4 - 5 小時　連接大致穩定

視乎音量而定，SoundSport Free 的連續使用時間大約有 4 - 5 小時。阿熾有時朝早去健身室 1.5 小時、返工 1 小時、放工 1 小時，一日都唔使充一次電。而跟機的充電盒可以額外提供多兩次完整充電（約 10 小時使用時間），所以都唔使特登記住要每日一充，只要用完耳機放返入充電盒就可以。有時用來煲劇的話，大約兩日連盒充一次電；只係做運動、返放工聽歌的話，三、四日充一次電都無問題。

SoundSport Free 較大的耳機設計，其中一個優點就是有較多空間，可以調校電路以帶來更佳音效，以及改動天線位置改善藍牙訊號接收。實際試用了一個月，連接方面幾穩定，只是間中左邊的「副耳機」會甩一甩聲，立即就會自動連接返，其他真無線耳機由於設計所限，普遍都有類似情況。另外，iPhone 的連接會較 Android 手機穩定。

額外功能：15 分鐘快充、防汗水、耳機追蹤

除了充電盒可以提供多兩次完整充電之外，SoundSport Free 仲支援快速充電功能，充電 15 分鐘就可以用 45 分鐘，有時無電臨急想用的話，充返三四個字都頂到跑步一個鐘。另外，耳機具備防汗水、雨水設計，防水等級達到 IPX4，阿熾算係超級大汗人士，暫時用落都無問題，至於係咪咁耐用，就真係要長用至知。

相信大家都試過手機亂擺，响屋企都要打電話畀自己先搵得返，藍牙耳機其實都經常有這種情況發生。Bose 就為 SoundSport Free 提供了一個幾貼心的「尋找我的耳機」功能，當耳機同手機連接緊（大約 10 米距離內），但係又唔知擺在哪個角落的話，開啟這個功能之後耳機就會發出聲響，等大家可以憑聲音搵返耳機。耳機響聲比預期中大聲，不太嘈雜的家居環境基本上都可以聽到，而且仲可以獨立控制左、右耳機發聲，使用幾方便。

音質測試：低頻強勁有彈性　分析力、音樂感都出色

阿熾對之前 SoundSport Wireless 的表現其實已經幾滿意，唯一係覺得低音硬少少，其餘都無乜投訴。今次「真無線版」的 SoundSport Free 音質竟然仲有得提升，改進了的音量優化均衡器（EQ）同 Bose 數碼訊號處理，令第一次聽 SoundSport Free 就已經覺得穿透力同立體感都更加好，人聲同樂器的細節亦都更加豐富，分析力都有一定的提升，雖然未至於相差得好誇張，不過由人聲結像到音樂的細緻度都做得相當出色，可以話係一個全面進化的版本。即使不是作為運動耳機來用，依然係一對相當靚聲的藍牙耳機。

至於 Bose 一向的強項低音方面，SoundSport Free 的低頻更加有彈性，量感夠多但不會吵耳，得益於少少開放式的耳塞設計，低頻亦都不會焗住而變得好臃腫。用 SoundSport Free 聽住重節奏的音樂跑步或者做其他運動，要衝擊力有衝擊力、要柔韌爽快有柔韌爽快，算得上係阿熾試用過低音最正的藍牙耳機，難得係真無線設計都可以做到這樣的效果，值得一讚。

總結：不止運動聽歌　日常使用亦一流

阿熾今次試用 SoundSport Free 足足成個月，可以話係長時間使用報告，用來取代用開的「有線」藍牙耳機，唯一要習慣係有時唔聽歌要放返入衫袋或者充電盒。SoundSport Free 的音質可算是市面上最好聲的其中一個選擇，甚至單講低頻效果的話更加係最靚聲的選擇（沒有之一）。各種配套設計都照顧得幾周到，15 分鐘快充、IPX4 防汗水雨水、尋找耳機等功能都好實用。連接方面算是幾唔錯，iPhone 的連接比起 Android 更穩定。除了作為運動耳機之外，日常返工放工戴住聽音樂都好適合。

Specifications
SoundSport Free
充電時間：2 小時
使用時間：5 小時
體積：31.2 × 25 × 30 mm（耳機）、37.5 × 100 × 47.5 mm（便攜充電盒）
重量：15 g（每邊耳機）、80 g（便攜充電盒）
售價：$2,098
查詢：Bose（2123 9000）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。