耳機設計:充電盒擺落褲袋無負擔
近年好多真無線耳機設計都好「巨型」,除了耳仔有負擔之外,亦都較易誤碰跌落。Vista 本身就好小巧,重量更加只有 6g,十分輕身,不過續航力就有 6 小時,相當長氣,因為市面好多同類耳機普遍都只有 3 至 4 小時播歌時間,有時做運動加埋返工、放工的確不太足夠。而 Vista 跟機的充電盒就可以提供額外 10 小時電量,並且支援充電 5 分鐘、使用 1 小時的快充功能。實際用落,基本上都不需要特別記住要充電,耳機用完放返充電盒、大部分時間拎起再用都會聽到「Fully charged」的提示,重度使用大概都係一星期充電一、兩次就可以。而且充電盒的重量只有 45g,輕巧扁身的設計亦都好易攜帶,擺落跑步褲袋不覺累贅,解決了真無線耳機不使用時要搵位擺放的問題。