【專訪】識聽梗係聽 Demo？ AGA：訝異樂迷喜歡

這次訪問 AGA（江海迦），因〈吃定我〉而來。
記得台灣歌手楊乃文有首歌叫〈你就是吃定我〉，女人因為受傷而湧起的情緒，可以有百千種，AGA 的〈吃定我〉又是另一種。
她的歌似乎都很慘情。
「係咁啱 hit 嗰啲都係慘。其實〈Superman〉、〈一釐米〉都好 sweet 㗎！」
是香港人喜歡慘歌，抑或我們的生活都太悲慘了？

最 dark 的歌

〈一〉大熱，AGA 人氣急升，連帶大碟《Ginadoll》也大賣，還讓她去年有機會在麥花臣場館舉行大型個唱，期間更發表了〈孤雛〉和〈獨一無二〉兩首新歌。

單曲時代，有時也搞不清哪一首歌才是新碟第一主打。〈孤雛〉和〈獨一無二〉都收錄在《Ginadoll Concert Live》，應該不算了，所以〈3AM〉才是下一張專輯的首支主打歌。〈3AM〉的成績很好，三個主要電台的流行榜都攀上了冠軍位置，是〈一〉之後最成功的作品。

接力的〈吃定我〉就來一個突破，AGA 形容這是她出道以來最 dark 的一首歌。「呢首歌同〈3AM〉係差唔多時間寫，都係上年年尾寫嘅，真係未試過呢種曲風，有啲 soft rock 嘅感覺。」AGA 說〈吃定我〉的歌詞最特別的地方是講一個狀態，而不是有甚麼訊息要帶出，「因為我過往嘅歌都有 message，呢首就講緊一個情緒、一個漩渦，一個女仔走唔出呢個狀態。」

唱片公司形容這是一首陰暗情歌，AGA 說寫的時候已發現歌曲比較 dark，demo 亦填了少少歌詞，但故事並不完整，主題關於「謊言」，女方知道男方講大話，情緒陷落，「但交畀林夕之後佢畀咗個更 dark 嘅 story 我！」

這次訪問 AGA（江海迦），因〈吃定我〉而來。記得台灣歌手楊乃文有首歌叫〈你就是吃定我〉，女人因為受傷而湧起的情緒，可以有百千種，AGA 的〈吃定我〉又是另一種。她的歌似乎都很慘情。「係咁啱 hit 嗰啲都係慘。其實〈Superman〉、〈一釐米〉都好 sweet 㗎！」是香港人喜歡慘歌，抑或我們的生活都太悲慘了？

找 Adrian Chan 合作只因喜歡 Faye

問到〈吃定我〉的 demo 算不算一首陰暗情歌，AGA 說歌詞不算填得好 specific，但 intro 同 outro 都有一些「嗌」的 layers，「自己寫嗰陣個 concept 係想寫啲 world music 嘅嘢，諗住編曲嘅 texture 都係 world music，即係有啲 bells 呀咁，總之個氣氛好似喺個山度咁」，但結果卻變成了帶點迷幻味道、以結他主導的作品。

AGA 說後來想到要找 Adrian Chan 合作，是因為聽了很多王菲的歌。「咁我發現王菲好多歌都係佢編，而我特別鍾意〈情誡〉，就諗：可以搵佢編喎，又未合作過」，於是〈吃定我〉便變成了現在這個樣子。world music 也好，soft rock 也好，總之有別於 AGA 以往的音樂風格。

AGA 沒有要求林夕依照 demo 的意思去填，任他發揮，說喜歡這樣跟填詞人合作，更有火花，「除非係一啲我好想寫、好 specific 嘅 topic，such as〈若〉、〈Superman〉，如果唔係我就畀有少少歌詞嘅 demo 佢哋，等佢哋寫佢哋想寫嘅故事。」

Demo 只是雛型

問一個創作歌手關於 demo 本來長哪個模樣，其實很不尋常，但 AGA 的歌「識聽梗係聽 demo」，已變成忠實歌迷的一個守則。只怪唱片公司接連為 EP《AGA》和大碟《Ginadoll》加推附有多首歌曲 demo 的版本所致，更重要的是，那些 demo 又真的好好聽。

然而 AGA 卻說，最初知道唱片公司把這些歌曲的「原始」版本拿來出版時，第一個反應是有點不好意思。「我覺得 demo 係一樣 unfinished 嘅嘢，我自己幾 surprise 啲人會鍾意聽 demo，因為對我嚟講 demo 係最 raw，production 嘅角度嚟講係未夠 fine，demo 只係我腦裡面好初步嘅 arrangement，但其實係未開始做！」不過對於 demo 受歡迎，AGA 表示「都係開心嘅」，「我覺得啲人鍾意聽係嗰個第一身嘅感覺，我創作一首歌最 direct 嘅感覺會放晒入去，但我自己就唔會覺得好特別。」〈3AM〉也一樣，大家已可在各大串流平台聽到填上了英文歌詞的 demo 版，rapping 部分更是 AGA 親自主理呢！唔知幾時會有得聽〈吃定我〉demo 呢？

新碟嘗試不同風格

〈3AM〉的 90 年代 R&B 風格深受樂迷喜愛，〈吃定我〉則破格走暗黑情歌路線，都予人耳目一新的感覺。新碟又會怎麼樣？「呢隻 album 對我嚟講係幾 experimental，因為之後有啲曲風可能係 Jazz，groovy 少少嘅又有，上年決定做第二隻 album 時已經諗住係呢個方向」，AGA 說唱片公司給予她很大的創作空間，沒有任何制肘，所以更應該展現多一點自己所擁有的 music library。

創作沒有制肘，但哪一首歌才是主打，唱片公司還是有意見的。「通常 R&B 喺香港嘅 market 都係 side tracks，但我自己就選擇咗〈3AM〉做第一 plug，幾好彩都爭取到」，原來最初唱片公司也有質疑聲音，信心只是一半一半，可喜是反應很不錯，否則可能沒有〈吃定我〉這樣的作品出現了，「好彩觀眾嘅 acceptance 都幾高，因為我喺呢隻 album 仲有好多嘗試！」但大家還是要慢慢等，新碟預計最快明年初才會推出。

行街睇戲搵靈感

《Ginadoll》是多年創作的成果，作為一個創作歌手，往往要和時間競賽，我以為 AGA 一定日日面對「交歌」的壓力，但原來她好輕鬆，自言「靈感到而家都仲有好多，一坐低就寫到」，「我都算係好快寫到歌嘅人，我諗 time management 係好重要，今年畀多咗時間喺 life balance 度，而創作靈感好睇你嘅 life experience，所以有時我寫寫吓歌都會出咗去行街…」所以女人行街，都未必只是為了 shopping，work-life balance 啫！

「電影方面都畀到我好多靈感，我好鍾意睇戲，最近我睇返《Léon: The Professional》（這個殺人不太冷）、《Girl, Interrupted》（我有冇問題，Angelina Jolie 成名作之一）呢啲 classic 戲，啲 script 寫得好好，加埋 soundtrack 會令你攞到一啲感覺。」大家即管留意未來 AGA 哪一首歌靈感是來自這兩部戲吧！

但大家別奢望新碟會有另一首〈一〉出現。「〈一〉之後，我幾 surprise 係我做唔同嘅嘢大家又接受到喎，因為〈一〉之後我係 start from zero，我係唔會再寫另一首〈一〉咁嘅歌。睇到之後〈孤雛〉、〈3AM〉同埋〈吃定我〉反應都 ok，原來大家都接受到我做唔同嘅曲風」，AGA 強調自己在音樂創作路上沒有任何壓力，不會重複自己。

目標成為別人的回憶

問到將來會否嘗試填詞，她說未敢：「英文都或者可以，廣東話太難填喇。我可以寫嚟玩吓，好似我寫畀李克勤嘅〈鑽石人生〉，demo 我都係填廣東話，但其實我只係『填字』，我唔會話自己係填詞人囉！」她說林夕、Wyman、林若寧、林寶等人才是真正的填詞人，每次收到他們的詞都會有「wow」一聲的感覺，「每個人嘅 talent 唔同，我覺得我暫時嘅 talent 都只係作曲。」

講起創作，AGA 就流露出很堅定、很有信心的眼神，問她會否唱別人寫的歌，她說暫時不會考慮。「我覺得作曲好好玩，co-write 都可能會嘅」，但她也表示新晉作曲人來說，特別欣賞林家謙，覺得他的作品很不同，風格也很廣泛，「林奕匡嘅〈停止繁殖〉、春嬌志明嘅歌都好好聽！」

寫到好的歌，令人興奮；聽到好的歌，也會使人雀躍。如果他日能成為別人的回憶，就更有成就感。「細細個就好想做 singer songwriter，因為好 inspired by Stevie Wonder、玉置浩二、Ray Charles、Alicia Keys 呢啲歌手，覺得佢哋都係某一個年代嘅回憶嚟，全條街都會聽佢哋啲歌。呢啲回憶係大過任何獎項，每一首歌都係你嘅 legacy。」十年八年後，你的成長回憶裡，會不會有 AGA 的歌？