《死侍》第一集仲有個副題叫「不死現身」，今次第二集就好直接，叫做《死侍 2》。電影有咩吸引？作為《死侍》續集仲唔夠吸引、仲唔夠叫座力咩！所以今次《死侍 2》都可以話好簡單直接地將上集的吸引元素全部擺入去，倒敘、插敘、爆粗、搞爛 gag、同觀眾直接對話都繼續有齊，而超慢動作場面、華麗的近身搏鬥等等都不會遺漏。

再來一次先聲奪人的華麗登場

大家仲記唔記得《死侍：不死現身》開場的一幕天橋追車槍戰？血肉橫飛、槍林彈雨，作為死侍登場的第一幕動作場面可以話先聲奪人，一下子就讓觀眾沸騰了。今次《死侍 2》都係一開場就同大家爆一爆，瞓在汽油罐上面點火自殺、爆到肢離破碎！劇情夠離奇，不過講到畫面震撼力就始終及不上第一集，那種血淋淋的場景真係好難在其他英雄電影見到。不過今集都一樣有好多慢動作、近身搏鬥的場景，加埋更多超能英雄出場，特技效果又比上集出色。另外，今集《死侍 2 》的日光同夜晚室內場景都好多，HDR 幾有發揮的餘地，就算在辦公室招聘離奇古怪的超能英雄，那種光影立體感同飽和的色彩都比普通 Blu-ray 版效果好幾多。唯一係監獄等幾幕太陰暗的場景，畫面雜訊稍多少少。

環繞音效更精彩

今次《死侍 2》的 UHD Blu-ray 係比較誇張的三碟裝，有成兩隻 UHD Blu-ray 同一隻 Blu-ray，收錄了「原裝上畫版」，同好有死侍風格的「死唔斷氣精彩加長版」。另外刪剪片段、蝦碌鏡頭、製作特輯等等都幾值得一睇，同樣係笑料十足。音效方面收錄了 Dolby Atmos 聲軌，表現同上集可以話不相伯仲，甚至今集仲精彩一點。中段機堡劫獄一幕，同死侍的肉搏低頻效果超正，加埋周圍吵鬧的人聲、打鬥聲、爆炸聲等等，音場超立體，而且包圍感夠晒突出，用來試環繞音效一流。中後段衝上囚車又係劫獄，死侍再對機堡的打鬥更加爽快俐落，加埋前面同後面幾段誇張的撞車、爆炸場面，個人覺得單以聲效來講甚至比第一集更出色。

影碟資料

片類：動作、喜劇
導演：大衛雷奇
演員：《綠燈俠》賴恩雷諾士、《復仇者聯盟》佐斯布連
語言：英語
音效：英語 Dolby Atmos、TrueHD、Dolby Digital 5.1 等等
字幕：英文、中文、西班牙文、法文等等
影碟數目：3
容量：UHD66 × 2 + BD50
視頻壓縮: HEVC
解像度: 4K、1080P
屏幕比例：2.39:1
特別收錄：刪剪及加長片段、蝦碌鏡頭、《死侍2》製作特輯、彩蛋片段、幕後講評、鏡頭下的機堡、死侍廣告雜誌2
級別：III

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。