近年「巨獸」類電影都幾受歡迎，《金剛》系列長做長有，另外仲有《哥斯拉》系列、《侏羅紀》系列，甚至《悍戰太平洋》、正在上畫的《極悍巨鯊》，主角或者大反派都係巨獸。通常這類科幻動作片聲畫效果都不會差，今次《末日困獸戰》也不例外，特別聲效方面有幾場戲都相當不錯，用來試機一流。至於劇情？去到最尾阿熾以為睇緊金剛大戰哥斯拉囉。

天花聲道音效多

《末日困獸戰》有 Dolby Atmos 聲軌，開場一幕太空船逃生的戲分，聲效的空間感同包圍感已經好唔錯。未至於有《引力邊緣》那麼細緻，不過都幾爆得，而且衛星、太空艙上面的細節聲定位都幾豐富同準確。之後就已經係猩猩、野狼、鱷魚變巨獸，聲效全部都好誇張。中段大猩猩佐治在運輸機上面甦醒大肆破壞、特種部隊追殺巨狼，到尾段三隻巨獸聚首一堂，將整個城市搞到滿目瘡痍，音效都好正。尤其低頻好爆得，加埋子彈聲、飛彈聲、尖叫聲、環境細節聲等等，雖然幾複雜，不過層次做得幾分明。值得一提係狄維莊遜今次都有揸直升機，感覺就好似睇緊加州大地震一樣，而且好多天花聲道音效，有 Atmos 喇叭的朋友會睇得好過癮。

Dolby Vision 發揮不大

今次《末日困獸戰》UHD Blu-ray 都係雙碟裝，Full HD 的影片同特別收錄的內容都係擺在普通 Blu-ray 碟入面。而 4K 影碟今次係有 Dolby Vision 的，不過整體發揮空間不算大，因為大部分場景都係日光日白，唯獨最初頭太空船爆炸可以見到比較明顯的效果，火光的亮度同細節、以及同太空艙內的陰暗環境對比，效果都算突出。另外，雖然《末日困獸戰》係用 3.4K 同 6.5K 的 ARRI 拍攝，不過中間有部分係 2K 製作，所以雖然大部分場景都好細緻，但都有少量場景可以睇得出分析力低一點。此外，部分場景亦都可以明顯睇得出係用 CG 拼接，不過大部分畫面的電影感同細緻度都做得不錯，起碼主角大猩猩佐治的毛髮、皮膚等細節都呈現得好精細。

影碟資料

片種：動作
導演：畢特比頓
演員：狄維莊遜、娜奧美夏莉絲、祖曼堅尼路、謝菲甸恩摩根
區域：A
容量：BD66 × 1、BD50 × 1
視頻壓縮：HEVC（4K）、AVC（1080p）
影碟數目：2
解像度：4K、1080p
影像：Dolby Vision
語言：英語 Dolby Atmos、DTS-HD MA 5.1 等
字幕：繁體中文、英文等
特別收錄（Blu-ray）：
• 點只遊戲咁簡單？
• 破壞三人組
• 動作巨星放大睇
• 困獸剪片段
• 搞笑蝦碌片段及更多精彩內容！
級別：IIB

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。