雖然一拖再拖，不過港版《死侍》UHD Blu-ray 的確就快推出，而美版 4K Blu-ray 碟亦都已經有幾多選擇。有 4K 電視、又有 4K 碟，只差一部播放機！所以唔少用家都蠢蠢欲動想買嚟玩。我哋今次就有機會率先試一試呢部 Panasonic DMP-UB900，加埋仲未正式發售的港版《死侍》UHD Blu-ray，睇下 4K HDR 可以有幾靚。
雖然一拖再拖，不過港版《死侍》UHD Blu-ray 的確就快推出，而美版 4K Blu-ray 碟亦都已經有幾多選擇。有 4K 電視、又有 4K 碟，只差一部播放機！所以唔少用家都蠢蠢欲動想買嚟玩。我哋今次就有機會率先試一試呢部 Panasonic DMP-UB900，加埋仲未正式發售的港版《死侍》UHD Blu-ray，睇下 4K HDR 可以有幾靚。
Panasonic DMP-UB900 是現時「唯二」的其中一款 UHD Blu-ray 播放機，因為價錢比起另一款 Samsung 的 UBD-K8500 貴一截（英版 Panasonic DMP-UB900 vs. 美版 Samsung UBD-K8500，約港幣 $6,700 vs. $3,100），後者比較多人揀，所以筆者在香港見親都是 Samsung。今次要特別鳴謝 AV Consultant 提供呢部 Panasonic DMP-UB900 畀我哋測試。雖然賣得比較貴，不過DMP-UB900 本身定位就較為高階，除了有 7.1 Pre-out 之外，雙 HDMI 2.0a 仲可以分開聲畫輸出，同軸、光纖仲有兩聲道 RCA 輸出都有齊，望落會覺得「足料」啲。
THX 認證大家聽得多，Panasonic 以往部分高階電視都有，表示器材符合 THX 標準，可以重現影院級影像效果，今次 DMP-UB900 都有。而另一個 Ultra HD Premium 認證就是新標準，詳情可以參考【SPILL百科：Ultra HD Premium】，簡單來講就是畫質達到現時 UHD 的最高標準，配合有 Ultra HD Premium 認證的電視使用，就可以重現 4K、HDR、10bit 顏色以及廣色域效果。比較可惜的是 DMP-UB900 只支援 CD、DVD 同 Blu-ray 播放，並不支援 SACD 或者 DVD-Audio，不過依然可以用 USB 或 DLNA 網絡功能串流播 FLAC、DSD 等 Hi-Res 音樂，對大部分用家來說影響並不算大。
大家平時見開的 Blu-ray 機設定選單其實選項普遍都不太多，要有聲畫分開輸出、播 Hi-Res 的選項、各種聲音動態、格式選擇，都要到 OPPO 103D、105D 之類先有，今次 DMP-UB900 都有齊。筆者第一次用都要慢慢摸下先了解晒各種功能，不過好彩 DMP-UB900 的選單部分有幾詳盡的介紹，基本上都好清晰。
之所以話 Panasonic DMP-UB900 的資訊好豐富、好好用，因為它的資料顯示的確極之清晰。尤其始終 UHD Blu-ray 是新格式，有時用家自己係咪播緊 4K、HDR，顏色設定是甚麼都未必會清楚，訊源係 HDR 結果播了 SDR、畫質大跌？DMP-UB900 就不會有呢個情況，因為一睇 info 就即刻清楚晒。
現時外地買 DMP-UB900 會附送兩隻 UHD Blu-ray，分別係《末日先鋒：戰甲飛車》同《加州大地震》，有新嘢梗係試新嘢，加埋港版《死侍》，用 3 隻 UHD Blu-ray 試下 DMP-UB900 的播放質素。附送的兩隻碟 load 碟都幾快，不過《死侍》的白版碟就好慢，要超過 5 分鐘，爭少少以為 hang 機，已經同發行方面反映，希望正式版會改善。
測試器材：
電視：Sony 55X9300D
Blu-ray 機：Panasonic DMP-UB900
HDMI 線：EHD VELOX EHV-HD2
今次用到的電視是 Sony 最新的 55X9300D，支援 4K、HDR，由於試機時間比較有限，所以直接用 Blu-ray 接駁電視播碟。先試《末日先鋒：戰甲飛車》，女主角駛入山谷逃走一段，第一個感覺是畫面細緻度的確比起 FHD 有唔少提升（廢話）。本來《末日先鋒》的 noise 其實幾多，以前用 4K 升頻睇的話效果唔太討好，畫面利得來會比較粗糙。UHD Blu-ray 版可以提升到銳利度之餘，但保持到皮膚的質感同細緻，點對點輸出的確係「有料到」。第二個感覺是 Sony 預設的 HDR 畫面模式之下畫面顏色變濃同變暖好多，要將色溫調高先至比較「正常」，不過同以前睇開的 Blu-ray 版仲係有少少唔同。
一睇個字幕就知呢隻《死侍》係港版，主角第一次出場打交一段，有車內對話同車外環境，入面暗、外面光，動態範圍表現好唔錯，基本上光暗細節都保持到，車入唔會黑成一撻撻。到室外激戰一段就係大背光，HDR 效果更加明顯，望落電視都有少少真係望上個天的刺眼感覺，不過雲層就保持到細節。以前睇呢類背光場面，一係個天「爆晒」、個人就灰灰地、一係就呈現唔到背光的對比度感覺，而家背光的人面雖然好暗、但依然好清楚，效果係幾像真。而《死侍》Blu-ray 本身細緻度就好好，加上唔少 CG，所以解像力同 UHD Blu-ray 差別就冇《末日先鋒》咁明顯。
4K 畫面解像度的提升對立體感都有幫助，事實上睇《加州大地震》幾場大樓倒塌的大場面都可以見到由精細畫面而帶來的立體感效果，即使係 2D 畫面都依然可以清楚感受到細緻的前後距離感，相當值得一讚。不過影片本身似乎並唔係用 4K 器材攝錄，所以解像度比起前面試兩隻碟會稍為爭少少，雖然都好精細，不過去到用 55 吋睇 4K 的情況就可以睇得出分野。
UHD Blu-ray 好多時大家都會將重點放到 4K 解像度上面，其實 HDR 同廣色域的效果對畫質提升仲明顯。以《加州大地震》阿爸阿媽衝過海嘯大浪一段比較，就可以睇到 UHD Blu-ray 個天明顯細節更多，而且天空藍色保持得更好。相片望落去已經有分別，實際睇分別仲大，另外嗰種背光效果亦做得更加像真，睇返普通 Blu-ray 係另一回事。
比較可惜係 DMP-UB900 並不支援 SACD，不過以一部高階 Blu-ray 機來說功能同規格都已經算相當強，而且播 UHD Blu-ray 效果非常好，除了畫質表現之外，操控反應都好快。六千幾的價錢定位係有少少高，不過 Panasonic 呢部明顯不是試水溫之作，而是一部完全 ready 的完成品高階 UHD Blu-ray 機。同 Samsung UBD-K8500 比？功能、規格 vs 價錢，筆者自己都覺得有啲難揀。
Specifications
Panasonic DMP-UB900
支援影碟：UHD Blu-ray、Blu-ray（-R/-RE/3D）、DVD/-R/-RW、CD/-R/-RW
影片格式：AVCHD、Xvid、MKV
音樂格式：FLAC（24bit/192kHz、5.1）、WAV（32bit/192kHz、2Ch）、ALAC（32bit/192kHz）、DSD（2.8Mhz、5.6MHz）、WMA、AAC、MP3
輸入：HDMI×2、LAN
輸出：RCA Audio、光纖、同軸、7.1 Pre-out
體積：435×68×199mm
重量：2.4kg
售價：599 英鎊
緊貼最新資訊，請讚好 SPILL Facebook 專頁。
