防水藍牙喇叭畀人的印象大概就是適合戶外、郊野使用，夠大聲夠 power，至於音質「入得耳」就算。JBL Charge 4 是一個例外，如果撇除防水功能的話，甚至可以話係千元級別最靚聲的「Hi-Fi 藍牙喇叭」之一，究竟實際表現有幾大驚喜？今次就同大家實試一下。

IPX7 耐用防水設計　20 小時長氣播歌

其實 JBL 的 Charge 系列一直都幾受用家歡迎，今次的 Charge 4 就是系列當中的最新成員。機身具備了 IPX7 防水功能，無論濺水甚至浸在水中使用都可以，游水、去沙灘等不同場合都可以繼續聽歌。外層選用了耐用的織物材料和結實的橡膠外殼，令喇叭可以更加耐用，郊遊或者做運動聽歌都適合。內置了 7,500mAh 充電池，播歌時間可以長達 20 小時，足夠幾日使用。除了通過 USB-C 充電之外，喇叭本身亦提供了普通 USB 端子，可以為手機邊播歌邊充電，設計幾周到。

連結超過 100 個 JBL 喇叭

JBL Charge 4 採用了專門新開發的單元，並且結合了 JBL 的雙低音輻射器，令輸出功率達到 30W RMS，以小型藍牙喇叭來說相當可觀。內置了 JBL Connect+ 功能，派對模式可以連結最多達 100 個兼容的 JBL 喇叭一齊出聲，就算空曠的戶外都唔怕唔夠聲。另外，以 JBL Connect App 亦都可以讓兩隻 Charge 4 組成立體聲喇叭，享受到更好的音樂定位效果。

音樂播放測試：背景寧靜　人聲突出

上面幾組字大概總結了 Charge 4 的聲音特性，其實 Charge 4 一開聲的時候係幾令人驚艷，因為背景實在好寧靜，加上突出而細緻的人聲，甚至令人有一剎那覺得係聽緊 Hi-Fi 喇叭的感覺。雖然再聽一會就發覺，始終體型所限，音箱的諧振會稍為影響了分析力，另外始終單隻喇叭也做不到立體的音場空間。不過以千元級別的小型藍牙喇叭來說，音質表現可以話幾令人喜出望外。

另外，由於箱身會有一定的震動，所以比較適合擺在較穩固的平面使用，直接拎在手上聽歌的話低頻同分析力都會打上折扣。新開發單元配合雙低音輻射器的效果的確好唔錯，低頻相當有彈性而且有一定的包圍感，動態亦都幾足夠。大約 7 成音量已可填滿 200 呎空間，真係戶外使用都幾足夠，同埋仲有 JBL Connect+ 功能可以駁多幾隻喇叭一齊出聲。

總結：千元級別最靚聲選擇之一

JBL Charge 4 的聲音表現好有驚喜，背景寧靜、人聲突出、分析力不錯、低頻夠彈性，可以話係千元級別最靚聲的藍牙喇叭之一。保留了 3.5mm 輸入以及設有 USB 供電都是相當貼心的設計。在我們為了影相拍片，不停噴水、灑水「蹂躪」之下依然「行得走得」，防水功能亦都經得起考驗。唯一係配套的 JBL Connect App 功能有限，只有配對 Party 模式同立體聲模式選擇，如果再多一點 EQ 及喇叭的設計就更實用了。

Specifications
Charge 4
顏色：黑、藍、紅、灰、湖水綠、白、綠、黃、粉色、沙色
無線連接：藍牙 4.2
單元：50 × 90mm
額定功率：30W RMS
頻率響應：60Hz - 20kHz
雜訊比：> 80dB
電池類型：鋰離子聚合物電池27Wh（3.6V、7500mAH，USB Type-C）
電池充電時間：4 小時 （5V/2.3A）
音樂播放時間：長達 20 小時（視音量和音訊內容而異）
USB 充電輸出：5V/2A（最大）
體積：220 × 95 × 93mm
重量：965g
配件：USB Type-C 充電線、快速入門指南、保養卡、安全說明書
售價：$1,399
查詢：Thinking Group（2955 1000）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。