大家成日講蝸居，細空間睇戲有時難免要有少少妥協，不過只要找到對的器材，在有限的地方依然可以發揮到不錯的效果。今次測試的 Marantz NR1609 就是一款為空間有限的用家而設的 7.2 聲道合併式 AV Amp，高度只有 105mm，擺位方面可以更靈活。Marantz 的薄身 AV Amp 一直幾受歡迎，亦都係市面上比較少有的薄身機選擇，究竟新一代機款有甚麼改進？今次就詳細測試一下。
大家成日講蝸居，細空間睇戲有時難免要有少少妥協，不過只要找到對的器材，在有限的地方依然可以發揮到不錯的效果。今次測試的 Marantz NR1609 就是一款為空間有限的用家而設的 7.2 聲道合併式 AV Amp，高度只有 105mm，擺位方面可以更靈活。Marantz 的薄身 AV Amp 一直幾受歡迎，亦都係市面上比較少有的薄身機選擇，究竟新一代機款有甚麼改進？今次就詳細測試一下。
NR1609 採用 7.2 聲道設計，有兩個聲道可以自由配置，作為後中置輸出玩「平面」的 7.2，又或者設定做天花聲道玩 5.2.2 都可以。每聲道 50W 的輸出足夠應付中細尺寸的空間，採用了 7 聲道分離式功率放大器來保證音質。而且電容方面亦採用了 6800uF / 63V × 2、電源方面則採用了 25A 高輸出，比前作的 10A 高出相當多，對音質提升有幾明顯的作用。解碼方面採用了 AMK 32bit/8Ch 的 AK4458VN DAC，音效方面就支援 Dolby Atmos 和 DTS:X，比較特別係今次加入 DTS Virtual:X 處理，就算本身未有 Atmos 喇叭，都可以用現有的 5.1 模擬到少少天花聲道效果。支援 Audyssey MultEQ 自動音場校正，擴音機可以通過 Audyssey MultEQ Editor 以及 Marantz 2016 AVR Remote 等手機 App 操作，加上本身的遙控器，使用同設定上都幾方便。
NR1609 配備了 8 入 1 出的 HDMI 端子，加埋色差、AV、同軸等端子，仲有「徇眾要求」新加入的 Phono 端子，以比普通 AV Amp 薄身一半的機款來說，接駁介面可以話好全面。另外全部 HDMI 都兼容 HDCP 2.2，支援 4K/60P 的 HDR 規格。網絡功能當然也相當齊全，支援自家相當好用的 HEOS 多房間串流系統，可以直接播放 Spotify、TIDAL 等平台的音樂，串流手機或者 NAS 音樂就最高可以支援到 24bit/192kHz 的 Hi-Res 質素，要方便亦都有藍牙、AirPlay 連接，雖然並未支援 Chromecast，不過用 HEOS App 已經可以讓 Andorid 用家好方便地播歌。
今次測試是在 Sound United 銅鑼灣的 HMV Showroom 進行，配合了 Definitive Technology 的 BP9020 座地喇叭作為前置，上面再加 A90 Atmos 喇叭模組，是一套好簡約高質的環繞喇叭組合，有機會再同大家詳細少少分享一下。因為好多時細空間之下，最難擺係超低音喇叭，由於 BP9020 已經內置了超低音輸出，加埋反射喇叭做天花聲效，單靠座地前置就已經出到 2.2.2 聲道，再加一對書架後置（ProMonitor 1000）、一隻中置（ProCenter 2000），就已經係 5.2.2 聲道系統，而且效果已經好唔錯。睇《哈利波特：死神的聖物》的 DTS:X 試片，穿過礦洞一段，路軌聲、周圍的細節碰聲以及瀑布水聲定位都好準，尤其空間感營造得好立體，加埋上方的水聲、周圍的風聲，整個音場重現得好完整。
之後再試新一代的《盜墓者羅拉》，女主角瀑布逃生一段，由水面到水底的音場轉換聲音質感幾像真，水聲密度稍稍不足，另外瀑布聲和飛機墜落的低頻量感稍為唔夠。當然亦都難怪，NR1609 比較適合 200 呎內、甚至 150 呎內的空間使用，而 HMV 的 Showroom 實際有成三四百呎，難免超出「負荷」。值得一提的是，雖然今次使用了反射式的 A90 Atmos 喇叭，不過空中的飛機聲、水聲結像都做得相當不錯，已經做到以往真係裝了兩聲道天花喇叭的大部分效果，值得一讚，配合埋水平的 5 個聲道，整個環繞聲包圍感好完整。至於 DTS Virtual:X 雖然都模擬到少少空中聲道效果，將前方的水平聲效，例如飛機飛過、子彈聲同水聲稍稍推高了少少，不過同實際上的天花聲道仍然有段距離，既然反射式喇叭已經做到相當不錯的效果，都係建議真係用返 Atmos 喇叭或者喇叭模組，可以有比較好的 3D 環繞聲體驗。
以 Marantz NR1609 的售價其實可以買高半級至一級的 AV Amp，不過當然係講緊 Full Size 的型號。唔講大家可能不知道，Marantz 上一代的 NR1608 比起前一代的 NR1607 銷量提升了 1.8 倍，薄身機的需求可想而知。而近幾年這個系列的確一直不斷有改進，今次加大電流、改良用料對音質的提升亦都幾明顯，加上有齊完善的接駁介面、最新的影音規格同埋串流功能，雖然貴了一級，不過對空間有限、又想享受到原汁原味 3D 環繞聲效的朋友來說，絕對物有所值。
售價：$5,580
查詢：Sound United（3900 0120）
請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。
