有留意吓影音產品的用家可能都知道，上年 Pioneer 的影音產品代理「變成」了 Onkyo，在產品、宣傳、銷售上面都有不少變化。究竟而家 Pioneer 同 Onkyo 的關係係點？Onkyo 的代理來經營 Pioneer 會為品牌帶來點樣的改變？定係 Pioneer 同 Onkyo 的產品會變得愈來愈似？對原本品牌的生意又有冇影響？種種問題，我哋就找來了 Pioneer & Onkyo Marketing Asia Ltd. 的 Marketing Manager：Maska Leung 同我哋一一分享。
可能大家同筆者一樣，有時都會混亂，收購？合併？入股？合作？究竟 Pioneer 同 Onkyo 而家係咩關係？Maska 就清晰咁話「Onkyo 是在上年 3 月正式收購了 Pioneer 的部分業務，包括大家最關心的家庭影院、耳機（同埋電話），不過就並不包括車機、TAD 同 DJ 系列。」日本總公司改名為「Onkyo & Pioneer Corporation」，至於香港公司都改名做「Pioneer & Onkyo Marketing Asia Ltd.」，所以有時大家見到 Pioneer XDP-100R 等產品的查詢會係「POMA」，就係新公司名的簡稱。而 POMA 會同時兼顧香港、澳門、部分亞洲地區的 Onkyo 同 Pioneer 業務，包括台灣、星加坡以及馬來西亞等。
大家都知道 Pioneer 的產品線、產品類型都好多好廣，擴音機、Blu-ray 機、播放器、耳機，講得出都幾乎有，一時之間要接手這樣一個大品牌有冇手忙腳亂？Maska 就話：「的確係幾大的挑戰，當時一知道要接手，就已經不停做資料搜集，Pioneer 當時响市場有咩產品、市場定位、用家群係咩背景、年齡層等等都要了解。」Maska 再補充：「有足夠資料之後，我哋再重新審視品牌，睇吓 Pioneer 要唔要重新定位？然後再決定之後的市場策略。」
成功非僥倖，過往一年 Pioneer 的好多產品，例如 SC-LX89 擴音機、BDP-LX88 Blu-ray 機、XDP-100R DAP 等一系列產品都賣得好好，都要歸功於出色的營銷。Maska 就話：「Pioneer 其實一直都有口碑好好的產品，例如 LD 機、Plasma TV、Blu-ray 機等等，形像已經好入屋，我哋就諗宣傳策略點將一個已經擁有咁好口碑的品牌，配合新產品帶到用家面前。」由於以往用家比較少機會接觸到 Pioneer 產品，所以營銷上除了想吸納更多年輕族群之外，上年開始，POMA 亦舉行了很多試影會、工作坊，讓有興趣的用家可以試玩到 Pioneer 的擴音機等不同產品；而買了機的客人，亦可以認識到更多 Pioneer 新機的設定同功能。
講到 Pioneer 與 Onkyo 有甚麼相似及不同的地方，Maska 就話：「Onkyo 主要集中响家庭影院擴音機同兩聲道產品，Pioneer 則涵蓋更闊的產品線 ，家庭影院擴音機、家庭影院組合、Blu-ray/Network player、酒桶木喇叭、Mini System、耳機等等都有。」整個年度兩個品牌合共推出的產品超過 20 個型號，「呢個行業推出新產品大多集中於 3、4 月開始，可想而知，一到新產品推出時間，Onkyo 同 Pioneer 兩個品牌嘅產品係一個接一個咁推出，公司同事尤其Sales & Marketing 係忙到放假都冇得抖呢。」
Pioneer 同 Onkyo 「合併」之後，大家最關心的可能係兩者的產品會唔會變到好似、甚至一樣？「兩者產品種類看似相似，但其實用料、設計、技術、價錢，甚至產品市場定位都唔同，兩個品牌都有各自的特性，會互相共享的可能只是 Wi-Fi、AirPlay 等組件和功能吧。」Maska 再補充：「Onkyo 講求聲音平衡，有一直引以為傲的 VLSC、Dynamic Audio Amplification 技術、AccuEQ；Pioneer 有 SABRE 晶片、MCACC 房間聲學修正技術、同埋 Air Studio 認證，擴音機講求聲音爽快得黎有細節，Blu-ray 機可以同時兼顧聽歌同睇戲。加上產品繼續由廠方各自設計研發，以往亦會保持各自的個性。」至於合併之後的得益？Maska 就話：「最直接當然係公司生意上的增長，其次係我哋製定策略時可以互補長短，補充市場上的缺口，從而增加市場佔有率。 」
緊貼最新資訊，請關注 SPILL 的 Facebook 專頁、Instagram 帳戶及 YouTube 頻道。如欲訂閱 SPILL Paper 電子通訊可按這裡。
