黑膠唱片，是以塑膠物料製成的，摩擦後容易產生靜電，令微塵積在唱片坑紋內，唱針劃過時會出現跳針現象，因而聽到俗稱炒豆聲的雜音和爆裂聲。所以清潔黑膠唱片是相當重要的一環，對聲音播放有極大幫助。我們找來 Guru Acoustics 負責人兼資深黑膠專家李智明（CM），講解一下保養黑膠唱片的方法，以及對洗碟有個深刻的了解。

「幾時洗碟無一個準則，你想洗就洗，好似沖涼咁，熱就去沖涼，唔爽咪去洗碟…」

保養功夫要做足

黑膠唱片相當容易沾上空氣中的塵埃，令不少新手玩家帶來不愉快的經驗。CM 玩咗幾十年黑膠唱片，黑膠最常見的情況是有塵，其次是放得太耐出現霉點，還有就是出現不同程度的「炒魷魚」。CM 表示：「收藏黑膠唱片時一定要垂直擺放，猶如書本擺放的方式，最好不要讓櫃內有空隙，有效防止變形彎曲。擺放唱片的地方，必須要通風或乾燥，若然有櫃門的，更有效防止唱片發霉。」很多人都說黑膠唱片很難打理，其實只要平時做好基本保養功夫，玩黑膠就是一件賞心樂事！

洗碟機無加過價

每次聽黑膠都要習慣用掃在唱片上掃一掃，將表面上或坑紋內的微塵去除，若然在播放時產生炒豆聲，表示唱片要清洗一下。「細細個已開始玩黑膠，後生時無錢，洗黑膠只係用一盆水，滴入數滴洗潔精，整張唱片放入去沖洗，然後掛起晾乾就可以喇。其實這個洗法只是權宜之計，點解咁講呢，因為一般用的自來水含有礦物質，自然會殘留在坑紋內從而傷害唱片。」CM 覺得最有效的清潔方法是用黑膠唱片洗碟機，現時的洗碟機五花八門，牌子眾多，一般洗碟機都採用吸塵機的原理，有些有一個長條形吸管，一次性吸乾碟上的水份，有些就會逐條坑紋吸水，CM 就比較鍾意使用後者，因為吸力集中於一點，會清洗得更乾淨，不過會貴一點。另外，還有超聲波洗碟機，運作原理像洗眼鏡機一樣，以高頻震動進行清洗。CM 表示洗碟機有平有貴，「幾千蚊都買到部質素唔錯嘅洗碟機，況且這類產品的價格一直以來都無咩點升，在通脹不斷升溫下，其實變相抵玩咗。」

唱片鍾意洗就洗

掃了塵後，發現仍有炒豆聲就要洗碟，CM 說出：「幾時洗碟無一個準則，你想洗就洗，好似沖涼咁，熱就去沖涼，唔爽咪去洗碟，洗碟是一件最簡單的事。」譬如新碟買返來都可以洗，畢竟在工廠環境下製作出來，有時新拆出來發現在坑紋內有微塵亦不出奇。雖然有些發燒友說，每次洗完碟後，高頻會有損失，但 CM 卻不認同，「我自己就聽不出有甚麼分別，二來一隻黑膠唱片會沖到幾多次涼？一隻唱片會聽過百、幾廿次的年代已經過去了，以前聽音樂只有黑膠，但現在又有 CD 及 CAS，新手玩黑膠可能只係想將歌曲轉成檔案；若然是黑膠發燒友，相信他們擁有的黑膠唱片已多不勝數，譬如我自己就收藏了兩萬五千多張黑膠，根本上好多碟都唔會再聽！」

霉點一定洗得走

訪問當日，筆者把家中發霉的舊黑膠帶埋去洗，一般情況下，印在黑膠表面的霉點一定洗得走，但是，一些很污槽的黑膠唱片，可能於坑紋內聚積了沉澱物，洗碟機也吸不出來。CM 娓娓道出：「當一隻唱片清洗乾淨後，最好換個全新的膠套，在深水埗買到，一至幾蚊有個，然後連埋紙套再放入一個有黏貼功能的透明膠套內，這樣做後，隻碟會再發霉都難。」在場筆者感受過一張唱片由未清洗到洗碟後，播放出來的聲音真是天淵之別，令人聽得很爽！

想瀏覽更多 SPILL 視聽專題，請即按 https://www.spill.hk/features/

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。