Plenue D2 是 Cowon 之前推出 Plenue D 的第二代升級版，同上代一樣係超小巧便攜的機身設計，拎出街聽歌都無乜負擔。最明顯的提升是在原本的 3.5mm 耳機端子之外，再額外提供了 2.5mm 平衡輸出。加上內部採用了雙解碼設計，而且原生支援 DSD 解碼，由規格到功能都有唔少提升。

雙 CS43131 解碼　加入 2.5mm 平衡輸出

雖然定位是入門 DAP，不過 Plenue D2 採用到兩組 CS43131 解碼晶片，更加是 Plenue 系列首款採用雙 DAC 解碼的產品。音質稍後再同大家詳細試下，不過單睇數字：訊噪比由 123dB 提升至 130dB，THD+N 失真由 0.004% 減少至 0.0004%，都可以睇到在抑制雜訊同底噪方面的提升，而且兩聲道的 Croostalk 也只有 -120dB（3.5mm）／-143dB（2.5mm 平衡）。比起上代機款，今次 D2 增加了 2.5mm 平衡端子，接駁選擇方面更加靈活。輸出都有 4Vrms，應付一些阻抗稍高的耳機或者大耳牛，都可以勝任得到。

支援 DSD 播放　45 小時超長續航

Plenue D2 最高兼容 24bit/192kHz PCM 播放，加入埋 DSD128 的支援，兼容的播放格式好齊全，常見的 WAV、FLAC、AIFF、ALAC、APE、MP3、WMA、OGG 等都播到。機身內置的記憶體亦都翻了一倍，達到 64GB，當然如果大家播好多 Hi-Res 的話都未必夠用，所以機身都提供了 microSD 卡槽，最高可支援額外 128GB 容量。而家好多採用 Android 等系統的多功能 DAP 續航時間都只有 10 幾小時，Plenue D2 由於是純播放器，播歌時間可以達到 45 小時（MP3）／ 30 小時（FLAC 24bit/192kHz）。雖然比起上代稍減，不過依然好驚人，聽足幾日唔充電都可以。

功能及操控：回歸純粹播放　按鈕齊全、細 Mon 但好用

Plenue D2 不設藍牙同 Wi-Fi 功能，優點是少了各種干擾，不過都意味住無得玩音樂串流，係一部純粹用來播歌的 DAP，特別適合主力播檔案的朋友，駁電腦過音樂、開 DAP 播歌，夠晒簡單純粹。用 microUSB 直駁的傳輸速度不算特別快，大概有 10MB 左右，抄大檔案想快的話可以用速度高一點的 microSD 卡，直接用讀卡器抄歌。

細機通常操控較為一般，不過 Plenue D2 的播放、音量等實體操控按鈕都有齊，而且排佈都好合理易用。2.8 吋屏幕雖然不大，不過用來揀歌、做設定等都好夠用，輕觸加埋實體鍵令到成個操控體驗好唔錯，用落幾順手。

音樂播放測試： 厚暖音色、不俗推力　2.5mm 輸出表現更佳

今次用 JH Audio TriFi Limited Edition 以 3.5mm 同 2.5mm 平衡耳機線，連接 Plenue D2 來測試播歌的效果。Plenue D2 的推動力以這樣的小巧的機身來說幾唔錯，大約調到 70 的音量（最大音量為 140）就相當足夠，平衡輸出的推力甚至再大一點。聲音幾有厚度、音色偏暖，所以呈現弦樂、鼓聲等的效果都幾唔錯。3.5mm 輸出稍稍覺得不夠通透，不過人聲分析力幾好，厚暖的音色男女聲都適合，聲音稍稍埋身一點。低頻有力而且相當有彈性，某些低頻太多的段落會有少少焗聲，但整體低音表現由分析力到量感，以入門機來說都幾令人滿意。

除了驅動力強一點之外，2.5mm 平衡輸出的聲音再「純淨」一點，背景再靜一些，整體分析力亦都再好一點。未至於好似某些 DAP，平衡同非平衡輸出差距極大，Plenue D2 的 3.5mm 三頻幾平均，表現不錯，不過 2.5mm 平衡輸出在驅動力、分析力同動態方面再好一點，所以耳機兩個輸出都好實用。

總結：輕便小巧的聽歌小良伴

好多出街會聽耳機的朋友，其實都想聽歌的時候音質再好一點，不過又嫌拎一部大過手機的 DAP 太麻煩、太「阻訂」，Plenue D2 就可以很好地切合這些用家的需要。小巧的體型、不俗的音質，三頻平衡、分析力不錯，偏厚暖的音色亦都討好。3.5mm 同 2.5mm 平衡輸出都有相當的質素，驅動力未至於超強，不過仍足以應付大部分的耳機。有屏幕可以顯示 Album Art 同各種資訊，亦都方便揀歌同操作，雖然不設串流功能，不過有關播歌的功能、兼容性以及續航力都好全面，可以話係一部小而強勁的聽歌小良伴。

Specifications
Plenue D2
DAC：CS43131 × 2
輸出：3.5mm（非平衡、2 Vrms）、2.5mm（平衡、4 Vrms）
訊噪比：125dB（3.5mm）、130dB（2.5mm）
THD+N：0.0004%（3.5mm）、0.005%（2.5mm、24bit/48kHz）
解碼：最高 24bit/192kHz PCM、DSD128
支援格式：DSD（DFF、DSF、ISO）、FLAC、WAV、AIFF、ALAC、APE、MP3、WMA、OGG
屏幕：2.8 吋（240 × 320）
連接：microUSB
容量：64GB（內置）、microSD（最高 128GB）
播放時間：45 小時（MP3、128kbps）、30 小時（24bit/96kHz）
體積：79.2 × 53.1 × 14.9mm
重量：97g
售價：$2,500
查詢：Digibrave（2595 2800）

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。