好多朋友都鍾意跑步的時候聽歌，亦都因此近年運動耳機發展得好快，由以往的有線設計，到後來藍牙運動耳機變成主流，再到最新的真無線耳機都開始有專為運動、跑步而設的型號。到底真無線運動耳機係咪適合跑步？我哋今次就搵到兩位香港本地的專業跑手陳家豪同黃芷銦同大家分享一下真無線耳機在跑步訓練時有甚麼優點，選購時有甚麼要留意。

•

一件戰衣的約定

由跑包尾到香港前十女跑手

相信唔少朋友都認識長跑名將陳家豪，曾經係香港 3,000 米、15 公里、半馬等等多個長跑項目的紀錄保持者。而黃芷銦就係家豪的徒弟，係近年冒起得好快的女子長跑新星，上年亞洲馬拉松錦標賽，跑出 2 小時 49 分 54 秒，殺入香港歷來最快全馬女跑手前十位。剛剛過去的渣馬，就以 2 小時 55 分 18 秒的成績，成為今屆最快的香港華人女跑手。

可能講大家都唔信，芷銦 5、6 年前剛開始學跑的時候，在家豪帶隊的訓練入面經常「跑包尾」，甚至甩開太遠要返轉頭搵佢。不過經過幾年的努力訓練，芷銦終於由「隊尾跑到隊頭」，甚至有望入到港隊，可惜在 3,000 米障礙同 5,000 米排名都係「梗頸二」而錯失機會。同一時間家豪就在 1 萬米項目入選，所以作為教練的家豪當時就送上港隊戰衣，叫芷銦入選港隊之後歸還。在這份鼓勵之下，芷銦終於在上年的亞洲馬拉松錦標賽代表香港出賽。穿著港隊新戰衣，在衝線後歸還教練舊戰衣，完成約定並且跑出「249」的佳績。

陳家豪 Profile

香港紀錄保持項目
• 香港 3000 米
• 香港 3000 米障礙賽
• 香港成年組 4 × 1500 米
• 前香港 15 公里及半馬拉松
• 5000 米及半馬拉松大專田徑

2014 香港業餘田徑總會 教練銀獎
2013 香港業餘田徑總會 新晉教練獎及優異教練獎
2009 香港業餘田徑總會成年組傑出運動員

黃芷銦 Profile

2018 香港渣打馬拉松（Women's Senior）亞軍
2017 香港屯門國際半馬拉松（Women's Senior）季軍
2017 黃金海岸機場馬拉松跑出 2:54:41
2017 日本香川丸龜國際半馬拉松（一般女子 B 組）亞軍
2016 仁川國際馬拉松賽（10 公里）亞軍

•

選購要點

1

 最重要「戴得穩」

在精英組的比賽當中，選手唔可以戴耳機，不過訓練的時候家豪同芷銦都話成日會邊聽歌邊練跑。問到揀耳機最重要的要求係咩，兩位專業跑手都不約而同話係要「戴得穩固」。芷銦表示，快跑、障礙跑又或者間歇跑訓練的時候，速度快、加上有汗水，之前用的耳機好易甩出來。「以前用有線耳機就好麻煩，仲會成日手肘帶到耳機線。後來即使用頸掛式藍牙耳機，頸後面摩擦住都易令耳機甩出，真無線耳機就可以真正好 free 咁跑步同做運動。」今次兩位都係 Jaybird RUN 真無線耳機的用家，家豪就話選購的時候要留意配件選擇係咪足夠，「以 Jaybird RUN 為例，佢配件好齊全，耳膠、耳翼的尺寸選擇夠多，就算唔同人用都可以揀到啱 size 的耳塞，令耳機戴得更加穩固，呢樣對跑手來講好緊要。」

•

選購要點

2

小巧輕身佩戴舒適

家豪之前都有用過其他牌子真無線耳機，而家用緊的 Jaybird RUN 佢就覺得真係好小巧輕身，「耳機細隻同輕身都幾重要，日常跑步經常要戴住，最緊要零負擔。」家豪仲話「耳機盒都最好可以細啲、方便攜帶，因為平時用完就會擺返去充電，小巧便攜用落先至方便。」

•

選購要點

3

防水防汗可以直接沖水清潔

芷銦係第一次用真無線耳機，除了無接線、使用上更方便之外，佢認為選購上另一個留意的要點係「防水防汗」。「因為跑步實會流汗，我哋有時訓練強度比較勁，就更加多汗。所以揀耳機防水防汗都好重要。而且防水設計，用完之後可以直接沖水清潔，亦都更加方便。」

•

選購要點

4

電量要足夠　有快充更好

電量都係要留意的地方，尤其真無線耳機因為設計所限，通常比起普通藍牙耳機電量會少一點。不過家豪同芷銦都話 Jaybird RUN 充滿電後可以連續使用 4 個小時，其實已經好足夠。「因為平時訓練，少的話半小時、一個鐘，長的話跑兩三個鐘，Jaybird RUN 可以用到 4、5 個鐘，所以都好夠用。」芷銦仲話：「因為本身耳機盒仲可以幫耳機充多兩次電，夾埋總共有成十幾個鐘，所以大約一個星期先要充一次電。」

家豪的使用習慣都差不多，佢最鍾意係 Jaybird RUN 的快充功能。「因為對耳機充電 5 分鐘就用到 1 小時，有時出門口之前先醒起唔記得充電，換衫、著鞋、去洗手間嘅時間，都夠充好電跑成個鐘，已經好足夠。所以揀耳機的時候，有埋這類快充功能就更加好，都係幾實用嘅功能。」

•

選購要點

5

手機 App 輔助：
EQ 調節及額外功能

很多人跑步時都有聽歌的習慣，尤其是聽快歌，令人更有動力去跑。問起家豪同芷銦，原來兩位都係咩類型音樂都會聽，芷銦仲話有時慢跑會聽慢歌，跑步的同時享受一下音樂。而家豪仲誇張，帶隊跑的時候除了聽，仲會唱埋出來：「聽住歌跑時間會快好多，Beyond 同 Supper Moment 都係至愛。」

不過男士同女士用 gadget 的習慣確有分別，芷銦就純粹用耳機來聽歌，家豪就好鍾意玩 Jaybird 個 MySound App，「自己偏好重低音，所以 EQ 度都 set 定加強低頻的效果，另外都仲有好多其他 EQ 選擇，好好玩。」家豪再補充：「另外有得响個 App 睇到耳機電量，同埋仲有尋找耳機功能，呢幾樣都好方便。所以如果耳機可供埋配套 App，有額外功能的話，就更加實用。」

今次找來陳家豪同黃芷銦兩位專業跑手分享使用真無線耳機的經驗，通常真無線耳機比起普通藍牙耳機，電量都會稍為少一點，長跑人士很可能會擔心唔夠用，不過原來平時訓練都已經好足夠。咁多個耳機功能同設計入面，家豪同芷銦都覺得戴得穩戴得舒服、唔阻住跑步最重要，諗落又的確係咁，如果成日要顧住驚耳機跌出來的話，都會影響訓練效果，其次先係防水防汗、快速充電、EQ 調節等等功能。

請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。