仲記得大陸閃燈品牌 Godox（神牛）推出首款採用鋰電池機頂閃光燈 V850 和 V860 的時候，好多用家都唔太睇好。不過似乎經過一段時間的考驗，大家對鋰電池的高速回電都幾受落，所以最近 Godox 就推出了 V860 II，有齊 Canon、Nikon 及 Sony 三個版本，兼容自家最新的 Godox 2.4GHz X 系列無線控制系統。

內置 Godox 2.4GHz X 無線接收器

V860 II 比起上一代最大的改變是內置了 Godox 2.4GHz X 無線系統，上代 V860 要插一個FT-16S 接收器落去先至可以遙控閃燈輸出，除了使用上唔夠方便之外，採用的亦只是 RF 443MHz 訊號。今次就同 AD360 II、AD600B 等 Godox 新閃燈一樣將 2.4GHz 接收器內置，除了可配合 X1 發射器使用之外，V860 II 本身亦可作為發射器遙控其他閃燈控制輸出，相當方便。

全光輸出達 650 次、1.5 秒回電

V860 II 的 GN 值為 60（1m、ISO100），採用了同上代一樣的 VB18 鋰電池，可以提供 650 次全光輸出，而且全光回電只須 1.5 秒，比起採用筆芯電的閃燈回電速度更快、閃光次數更多。V860II 同時支援 2.4GHz 和紅外線遙控功能，可作為主燈或副燈使用，支援 A、B、C 三個分組設定，Canon、Nikon 及 Sony 三個版本就對應各自的 TTL 系統，並且支援高速同步，最高同步速度可達 1/8000 秒。燈頭設有變焦功能，支援 20-200mm 焦距。V860 II 售價為 $889 人民幣，約港幣 $1,050，以副廠燈來說稍貴，不過規格亦比較強。用的時候要記得充滿電又或者準備後備電，呢樣就比唔上筆芯電方便。