【硬碰硬】LED vs. 閃光燈：「方便易用」與「靈活光猛」大對決

2019年10月24日
熾

近年 LED 發展愈來愈成熟，發熱低、壽命長、操作穩定又便攜，除了拍片會用到之外，亦都愈來愈多朋友用到 LED 來影相，以取代閃光燈。雖然 LED 好多優點，不過傳統閃燈依然有無法取代的地方，今次就同大家分享一下 LED 同閃光燈各自的優勢，鍾意影相的朋友又應該點樣揀？

	易用
LED		閃光燈

响「易用」方面 LED 的確係大勝閃光燈，後者好多時直打又太硬、面油反光又勁，打 bounce 的話顏色、光暗又錯晒；LED 最大優點係所見即所得，主體光得滯就調暗一點、陰影重得滯角度就調節到正光一點，全部都即刻睇到再影，易學易用好多。

近年 LED 發展愈來愈成熟，發熱低、壽命長、操作穩定又便攜，除了拍片會用到之外，亦都愈來愈多朋友用到 LED 來影相，以取代閃光燈。雖然 LED 好多優點，不過傳統閃燈依然有無法取代的地方，今次就同大家分享一下 LED 同閃光燈各自的優勢，鍾意影相的朋友又應該點樣揀？

LED 有所見即所得的優勢，影之前已經可以預視到拍攝的效果，調節光源亮度、角度等會較方便。唔似得閃光燈好多時要影完先知，有 modeling 都只係幫到一點。

	亮度
LED		閃光燈

無論 LED 或者閃光燈的亮度都同功率有關，輸出勁一點自然就光一點。不過用作影相的話，閃光燈「一剎那的光輝」亮度可以做到比相同功率的 LED 強好多倍，例如 100W 的 LED 在大太陽之下要補光可能都勉強，但係 100W 閃光燈擺得近少少的話做壓光效果都可以，亮度方面就閃光燈有較大優勢。

要响大太陽之下做到補光甚至壓光的效果，好多普通閃光燈都做到，但係 LED 就要專業級器材先得喇。

	色彩
LED		閃光燈

以往無論拍片影相都好少用到 LED，最主要原因就是 LED 燈的光線光譜不完整、色彩還原力比較低。新一代 LED 燈的顯色性（Color Rendering Index／CRI）已經做得好好，就算平價入門燈好多時都有 CRI 95、96 或以上，已經追近閃光燈的色彩還原力。

而家好多市面上拍片用的 LED 燈都做到 90 甚至 95 以上的 CRI，用來影相都有好唔錯的色彩還原。

	便攜
LED		閃光燈

雖然基本上都係愈光的燈、體積就愈大，閃光燈都有好多便攜細燈，不過 LED 就的確有更多不同尺寸選擇。甚至一支細細 LED 電筒仔，如果使用得宜都影到好多效果特別的靚相。

雖然市面上都有好多細閃燈，不過 LED 的各種不同大小選擇就更多。

	顏色
LED		閃光燈

近年 LED 發展五花八門，例如部分型號色溫可以自由調節就好實用，匹配返環境現場燈光顏色變得好容易。另外，甚至有一些加入了 RGB LED，可以自由變換顏色，想拍攝不同效果都可以。

而家有部分 LED 燈除了可以自由調節色溫之外，仲加入 RGB LED、可以通過手機 App 來自由選擇燈光顏色，極之靈活。

	光質控制
LED		閃光燈

攝影有個概念就係光源的面積愈大、光質就愈柔和，攝影師就可以根據自己需要來選擇用「軟」定「硬」光。雖然而家都有 LED Panel 幾大塊，LED 燈亦都可以擺入柔光箱或者加柔光屏，不過閃光燈都一樣，而且有時只需要 bounce 落牆身就有柔光效果，光質控制方面較為方便靈活，稍為佔優。

閃光燈通過簡單的燈頭方向調節，利用環境反射就已經可以做到好多唔同的燈光效果。

總結：閃光燈有時無法取替

雖然 LED 燈好好用，攝影攝錄都用到，不過單講影相的話，閃光燈都依然有佢優勢。更大的瞬間亮度，可以做到壓光的效果，打 bounce 就可以方便獲得柔和光質，仲有一些特別題材，例如凝結瞬間畫面等等，都係閃光燈先做到。所以雖然 LED 燈好易用效果又唔錯，不過閃光燈有時又真係無法取替，後者雖然難用一點，不過識得用其實好好用。