「聽唔聽得明我啲廣東話？」筆者跟顧芮寧（Elaine Koo）做訪問，就是由這個問題開始。當然，是她問我的。三年前首次訪問顧芮寧，只能以普通話對談，其實當時即使她堅持要說廣東話，我可能也只會回應一句：不如都係講返普通話好嗎。事隔三年，顧芮寧首張個人專輯終於推出，她已能說一口頗流利的廣東話，是有點口音，但肯定不會聽得辛苦。

南下發展　先唱廣東歌

來香港發展，自然要說廣東話，顧芮寧也很明白這個道理。三年前她來港發展，也是先唱廣東歌（首支派台歌〈我只需要知道〉），還拍住鄧建明，以「結他神雕俠侶」這個其實諗返都覺得有啲肉麻嘅「偽組合名稱」做宣傳，希望能打入香港的市場。不過，翌年推出了單曲〈三千公里的理想〉後，就再沒有下文，原來是「在香港寫唔到歌」的緣故。

「可能唔慣香港嘅生活方式，加上語言不通，喺香港寫唔到歌。於是我就返北京閉關寫歌，寫咗一個月多。最後我交咗十幾隻歌畀公司，佢哋揀咗七隻，再加埋之前三隻，咁就出咗呢隻碟。」新寫的歌倒全是普通話的，但不是因為要配合內地市場，而是她希望唱自己所寫的，「我覺得錄廣東歌係好有意思，但我而家廣東話仲係唔叻，寫唔到廣東歌詞」，她說希望日後多唱廣東歌，認為這對語言能力提升很有幫助，「因為錄音要求發音標準，咁先會知道邊一個字係唔啱嘅，平時唔會有人挑剔你。」

說來，成件事其實好弔詭。顧芮寧是南京人，在南京長大，她四歲便學琵琶，因為在南京藝術學院音樂系就讀時要多學一種樂器，於是與結他結緣，從「正統」走向「狂野」。畢業後還組過樂隊，是 V4 的主音兼結他手。因為在北京一個派對上認識了譚詠麟，被邀請擔任其巡唱結他手，漸漸步入了香港的音樂圈。當香港歌手都北上賺人仔，連廣東歌都少唱時，她選擇了南下發展。

猛人雲集　中港台結他手齊撐

「我嚟香港發展時，好想同香港嘅樂手有多啲交流，學習吓，而做校長嘅 tour 時就識得一班 band 隊嘅結他手，譬如 Joey 哥（Joey Tang）同 Joey V，咁我覺得呢啲音樂上嘅交流係好有意思嘅。」而這也是顧芮寧這張同名專輯《Elaine Koo》的概念由來，每一首歌都找來一位結他手客席演奏，從而接觸更多香港的結他手和音樂人，「又可以了解佢哋點樣做錄音，同埋認識多啲香港嘅文化」。

但專輯中出現的結他手並非全是香港人，也有內地著名的結他手李延亮，對於香港樂迷而言，對他的認識大概是從王菲的專輯開始，他也曾擔任王菲巡唱的結他手。「我想介紹內地嘅結他手畀香港人認識，因為內地都有好厲害嘅結他手」，除了李延亮，專輯中另一個「海外」勢力，是五月天的結他手怪獸，所以也可以說，《Elaine Koo》是集合了中港台結他手的力量。

只是，顧芮寧畢竟是新人，要請得郁怪獸、黃貫中等她之前並不認識的當紅結他手，當然不容易。可喜是她簽的是「大廠」（環球唱片），有一定的牙力，但更重要是她的結他技術、她創作的歌和這張專輯的概念，吸引到這班結他手參與。「可能佢哋都想撐吓樂壇新力量，好開心佢哋肯幫手。」顧芮寧謙虛的說。

問到有沒有哪位結他手很想邀請，但最終未能成事，顧芮寧給了筆者一個意外的答案：Orianthi。「我好想同佢合作，因為我同佢都係幫同一個結他牌子（PRS）做代言，而且都係女結他手，但可能檔期問題，最後都係未能夠成事。」Orianthi 曾經被 Michael Jackson 選中擔任「This Is It」巡唱的結他手之一，出席了所有「This Is It」演唱會的綵排，可惜巡唱還未正式開始，Michael Jackson 便已離樂迷而去了。

中西合壁　當琵琶遇上搖滾

有份參與的結他手主要是以演奏為主，在編曲的構思上並未有加入個人意見，顧芮寧說「覺得首歌幾啱佢先搵佢」，但有些結他手風格很強，幾乎一聽便聽得出來了。黃貫中有份參與的〈隨心流浪〉，歌曲尾段更有近一分鐘的 solo，精彩到極。

編曲上，新寫的歌大部分由 Johnny Yim 負責，只有〈撐過黑暗〉是由一位九十後的音樂新力軍鍾楚翹操刀，而這也是全碟最具特色的一首歌曲，帶點迷幻氣息，而且加入了顧芮寧自幼便學習的琵琶，中西合壁。她在初出道的時候，已曾表示希望將琵琶融合到搖滾音樂之中，「我唔想特登去做，但呢次我覺得係幾成功，我試過琵琶加 effect 去玩，但出嚟嘅聲音係似結他，我覺得如果係咁點解唔用結他呢？我想要返原本嘅聲音，於是只係做咗少少後期處理，總之要聽得出係琵琶。」

而這首歌最終被選為主打歌之一。「我估唔到公司會主打呢首歌，因為呢首唔係好 Pop 嘅歌，有啲實驗性，但我覺得音樂係需要呢啲實驗性。我好鍾意 Pink Floyd，我覺得佢哋就係創造咗好多唔同嘅聲音，有好實驗性嘅嘢，我希望可以做到呢樣嘢。」這首歌曲顧芮寧找來 Terry Chan 彈結他，二人是在「左麟右李」演唱會認識的，「之前佢係彈 bass、彈 keyboard，亦係好勁嘅 producer，但因為做咗左麟右李，我知道佢都係好厲害嘅結他手，佢真係畀到好多驚喜我，你聽到個音色係左右兩邊不停飛來飛去，令到呢首歌迷幻色彩好濃。」

不只搖滾　不同元素共冶一爐

所以，大家別以為顧芮寧只有那些很硬橋硬馬的搖滾音樂，她也有為自己的作品注入很多不同的元素，像〈自救〉就有點 funk 的味道，〈多謝你愛我〉則是一首很典型的情歌，她三年前的第一首派台歌〈我只需要知道〉，在 C.Y. Kong 的編曲底下，甚至佈滿很多精彩的電子聲效。「好多人話 Elaine 成個 Rock 女咁，但我自己唔係好覺得，我覺得我係 Rock 底，但唔係 Rock 女，我希望大家喺我嘅音樂裡面，聽到唔同嘅元素，同埋唔同嘅可能性，唔單只係 Rock。」

搖滾在香港的流行音樂「市場」上一直不被看好，成功（如果膚淺地只以商業成就計算）的例子寥寥可數，Rock 女也好，Rock 底也好，同樣困難重重。但顧芮寧仍然認為來港發展，比在神州大地更好：「我覺得做音樂都係想多啲人聽到，內地太多人了，其實反而會少啲人聽到。」她笑言要好努力做宣傳，希望多些人知道有這張專輯，新碟附送她早前演出的 DVD，她說不能錯過：「我覺得音樂除咗聽之外都應該要睇，最好係 live，如果睇唔到都可以睇呢張 DVD。」結他手都是希望被「看見」吧？當然，又有哪個音樂人不渴望這樣呢？

緊貼最新資訊，請讚好 SPILL Facebook 專頁。