去年陳慧嫻推出第二張「發燒碟」《Evolve》，筆者有機會跟她做一個訪問。訪問當日，陳慧嫻未到，監製葉廣權（Joseph Ip）先到，忘了為甚麼，他開始談起自己初當監製的日子，於是我便想到：不如找天訪問這位樂壇幕後功臣？後來他再為盧冠廷監製《Beyond Imagination Too》，又再一次碰面，便正式邀約。一拖再拖，訪問終於在 7 月底完成，地點是香港最具代表性的錄音室 Avon，感覺上特別有意思。
去年陳慧嫻推出第二張「發燒碟」《Evolve》，筆者有機會跟她做一個訪問。訪問當日，陳慧嫻未到，監製葉廣權（Joseph Ip）先到，忘了為甚麼，他開始談起自己初當監製的日子，於是我便想到：不如找天訪問這位樂壇幕後功臣？後來他再為盧冠廷監製《Beyond Imagination Too》，又再一次碰面，便正式邀約。一拖再拖，訪問終於在 7 月底完成，地點是香港最具代表性的錄音室 Avon，感覺上特別有意思。
「唔知點解畀人標籤咗做發燒碟，哈哈！」年紀輕的樂迷也許不知道，葉廣權是譚詠麟、關淑怡的御用監製，盧冠廷推出《Beyond Imagination》的時候，他才第一次接觸所謂「發燒碟」，但在他的製作下，唱片大賣，不單造就了續集《Beyond Imagination Too》的出現，更推到盧冠廷再踏紅館舞台。歌者的魅力固然重要，但監製也是功不可沒的。
於是，大家都誤以為葉廣權是「專做」發燒碟的，事實上，他在流行樂壇已發展了 36 年，做監製的資歷也有 34 年。「我喺 1980 年入行，當時讀完 form 7，就去咗讀一個無線電技術課程，讀到個 diploma 之後，咁橋當時我大佬有個 friend 喺寶麗金做，請緊 studio trainee，咁我就入咗去做。」
Joseph 說，最初只是「跟吓啲師傅，整吓機」，但做了 3 個月之後，老闆便問他想繼續「整機」，抑或嘗試一下錄音工作，他想也沒想便答：「梗係錄音啦！」於是便做了一年多的錄音工程師（recording engineer），跟過細 AL 等前輩工作。到 1982 年，老闆又問他有沒有興趣做監製，他也是沒有多想，答：「梗係有啦！」
Joseph 最早期監製的唱片，包括鍾鎮濤的《要是有緣》、露雲娜的《Sha La La 我愛他》和徐小鳳的《每一步》等，1986 年開始參與譚詠麟唱片的製作（《第一滴淚》），他笑言從黑膠、卡式帶，走到無人買碟的年代，可謂經歷了所有起伏。
從錄音師做到監製，工作性質很不同，但也因為這個出身，他比一般監製更懂得整個唱片製作的過程，不用太多人幫忙，想個 bass 和鼓有甚麼音色和效果，可有更多自己的主意。
很多讀者可能都不怎麼了解唱片監製究竟要做些甚麼，Joseph 這樣形容他初當監製時的工作：「當時打工，老闆會 assign 啲歌手畀我做，我就要幫佢哋諗，設計吓啲歌嘅形象，即係 Disco、Rock 定係 Reggae 咁。唔識作曲嘅歌手就要幫佢搵歌，嗰陣好興 cover，所以每日都要聽好多歌。」
遇上如鍾鎮濤或蔡國權等創作歌手，也不是翹埋雙手冇嘢做，「都會 input 吓啲 style，建議佢不如寫呢啲歌」，Joseph 說過程是互動的，「唔係一個人講晒，其實做唱片始終係一個 teamwork。」
返工除了錄歌，就是聽歌，聽落好似好嘆。「其實好辛苦！日日返十幾個鐘頭工！唔使錄音的時候，都要不停聽啲日本歌、韓國歌，搵適合嘅做 cover（改編歌），又要打去搵啲 publishing company 問有冇歌可以畀我聽，日日係咁聽係咁聽」，Joseph 說枱面通常有過千隻歌等住佢聽，有時更要同其他監製爭歌，因為大家其實都係收緊同一份歌。不過，80 至 90 年代是仍有 in-house 監製的年代，一班寶麗金的監製也會和老闆坐埋一齊開會，討論哪一些歌該交給張學友，哪一些歌又較適合黎明，相當公道，也避免了「撞歌」的情況出現。
香港唱片業最輝煌的時期，寶麗金曾同期有多達 5 個 in-house 監製，包括歐丁玉、陳永明、黃祖輝、向雪懷和葉廣權，每人負責至少兩個歌手。當年歌手一年閒閒地會出兩張大碟，換句話說，監製每年就要製作 4 張大碟，合共約 40 首歌，還未包括演唱會專輯的一些後製工作。
現在很多唱片監製本身都是知名的作曲人，而大家可能不知道，Joseph 其實也有寫歌，不過產量並不多，入行之前他更是 band 仔一名，負責彈 bass。我問 Joseph，監製兼任作曲工作，不是比自己搵歌更容易掌握歌曲的風格嗎？「呢啲嘢好主觀，自己寫歌，就算好滿意，歌手同老闆都未必鍾意。我又冇乜所謂，唔鍾意咪收埋佢。」Joseph 說他寫的歌數埋唔夠廿隻，都是收工喺個琴彈吓彈吓而誕生的，最滿意的作品是譚詠麟的〈我的生命我的愛〉，這首歌以「草生」名義發表（這個名字，關淑怡的樂迷也該見過吧？），是他與周啟生合寫歌曲時用的名字。
Joseph 還說，歌曲能不能流行，有時也講緣份。就像關淑怡 1989 年的成名作〈難得有情人〉，本來是想找鄺美雲唱的，這首由盧東尼譜曲的作品，在 1987 年已經誕生。「當時未有歌詞，只有一個很簡單的編曲，但 Cally（鄺美雲洋名）聽完就唔係咁鍾意，話唔係好適合佢。」結果歌曲塵封兩年，直到關淑怡簽約寶麗金，推出第二張專輯時才再「出土」，新人當然不會 say no，甚麼歌都要唱，卻沒想到就一炮而紅，更橫掃了該年樂壇頒獎禮不少獎項，不知道鄺美雲有沒有後悔？「隻歌鄺美雲可能冇 feel，咁呢啲嘢冇得迫嘅，同埋當時用嘅話也唔一定係〈難得有情人〉呢份歌詞，呢個題材都係我後來同 Jolland（向雪懷）提議先至出現。」
提到關淑怡，Joseph 表現特別雀躍，因為是他一手「湊大」的。關淑怡的處女作《冬戀》（1989）到《eZONE》（1998），期間一共 13 張專輯（兩張國語專輯是他和台灣的林明陽共同製作）都由 Joseph 監製。「幾 enjoy 同佢錄音，佢係好有天份，唱歌好好聽。當你搵到一隻歌，然後隻歌好流行，又賣錢，令佢知名度提升，嗰個成功感係錢買唔到；而且佢係新人做起，啲人唔識佢，但最後做到個 style 出嚟，感覺係幾自豪。」
這麼多年來監製過的唱片當中，Joseph 說最滿意的是關淑怡的《'Ex' All Time Favourites》，這也是關淑怡入行以來最暢銷的一張專輯，當年更打低了劉德華同期推出的翻唱專輯《Memories》，其中〈忘記他〉更鬧雙胞，江希文也在差不多時候翻唱，但口碑卻是關淑怡大勝。「係我有史以來最大膽的製作，有好多突破，混音嘅方式同一般流行專輯好唔同。譬如〈深夜港灣〉，專登將個和音推去前面，嗰陣冇人會咁做。難得老闆又信得我過，搞到天花龍鳳都得。」
當然，關淑怡咁有性格，也有很多自己的意見，難免有磨擦。這張碟中翻唱張學友的〈李香蘭〉，Joseph 形容為帶點 Pink Floyd 的味道，錄音時便在演繹的方法上有點拗撬。「Shirley 話我唔尊重佢嘅意見，但其實唔係，喺我角度佢唱得好『lur』，係亂唱，但佢覺得咁樣好有 style，我唔畀佢咁做。」結果錄音當日火藥味太濃，Joseph 直頭嬲到走咗，留下 engineer 和關淑怡慢慢錄，沒料到竟錄到深夜，關淑怡的堅持真的不能睇小。Joseph 說不喜歡她後來翻唱〈陀飛輪〉的那種唱腔，笑言「唔關佢事」，「我自己唔鍾意，後來都有問佢做乜咁唱」。或者，這就是監製的影響力了，不同人就會有不同的效果；Joseph 更舉例，認為梅艷芳也是黎小田監製的時期最一流，轉了監製後他就沒那麼喜歡了。
除了主力監製譚詠麟和關淑怡，Joseph 也監製過蔡國權、草蜢、黎明、周慧敏、陳慧嫻等歌手，當然，都是寶麗金旗下的。到 1998 年，Joseph 決定要轉換一下環境。「當時有啲厭倦咗，一直都係圍繞呢一班歌手，我覺得諗唔到嘢了，而且呢班歌手都係好賣得，產量太高，要密密做，但一年得 300 幾日咋喎！嗰時都有個秘書，會幫你安排好晒每日錄啲咩，佢話你返工就得㗎喇！」
那時候華納唱片曾找他過檔，他心大心細。「當時最紅係鄭秀文，但我心諗，唔過癮喎，來來去去咪又係嗰幾個，不如 freelance，發揮多啲。」於是，1998年 Joseph 離開寶麗金後，就為不同的唱片公司工作，英皇、東亞、CBS、華納，全部都做過，但那時候唱片業已開始式微，工作也沒從前的多了，到現在根本已沒有幾多個 in-house 監製，市場養唔到呢班人。「我心態係冇乜所謂，有人賞識就做吓，係新嘅歌手唔識唱歌，又要監製，咁先最辛苦，試過監製幾個歌手係好難頂！」至於誰是他口中好難頂的歌手，他當然不肯透露，只提到張柏芝也不易「應付」。「〈星語心願〉是我監製的，當時覺得佢個 key 係偏向男人 key，又鵝公喉，不如整隻麻甩啲嘅歌畀佢，估唔到就成功咗。但過程係好辛苦，叫佢不如咁樣唱，佢係畀唔到我。」Joseph 說，後來科技發達，可以慢慢執，80 年代唱得不夠好的話，一定要唱過。「而家嘅科技五音不全都執到，不過雖然咁講，個 feel 係執唔到嘅、感情係執唔到嘅。」
Joseph 說，譚詠麟、關淑怡、徐小鳳這幾個歌手，都屬於「易做」，錄音時好嘆，一首歌唱第一次已經好好聽，不用多費唇舌，只要略作修正，便已達到很高的水平，譬如徐小鳳的經典〈婚紗背後〉，其實只錄了幾個 take，少到連小鳳姐都有點懷疑當時仍算是「新仔」的葉廣權，要錄到凌晨 4 點才肯「收口」，但結果用的還是前一晚 7 點錄的第一 take。「佢哋本身天份高，而且自己又有做功課，表現自然好。」他說音樂講感覺，有時吹毛求疵唱到個音好準，但個 feel 冇咗，都係冇用。
Joseph 和很多天王天后都合作過，問他有沒有哪位歌手很想合作，卻一直沒有機會，他馬上答：林憶蓮。他笑言自己不太 high profile，也從不自薦，還是要等 artists 自己找上門。譬如 2010 年陳奕迅便邀請他監製一張 EP，那張成品叫《Taste the Atmosphere》，沒有 Joseph 操刀，誰請得郁露雲娜出山唱〈講男講女〉？又有誰會做一隻英式另類搖滾〈超錯〉給陳奕迅？
科技的進步，令到加入樂壇的門檻低了，音不夠準就 tune 到準。所以 Joseph 在訪問初便說他經歷了所有起伏，包括錄音方式的演變。「以前係 analog 年代，而家係數碼錄音，基本上係無限 tracks，你想 100 條都得。當然有時咁多係多餘嘅，因為做 balance 會好麻煩，除非隻歌真係好複雜啦。」
他說自己入行的時候已有 16-track，基本上好夠用，除非有管弦樂，才需要想想怎處理。「所以又唔可以話好困難，multitrack，分開錄又得，一齊玩一齊錄又得，做好呢啲工序先唱歌，歌手聽住啲音樂錄，就係咁簡單。」他說 60 年代得兩條 track，一定要 live，後來發展到 4-track 就好玩好多，「George Martin（The Beatles 的錄音師）係一條 track 錄晒鼓同 bass，一條 track 就錄結他，另外一條 vocal，一條和音。如果唔夠用，就會將兩條 mix 落一條，咁就會騰空返一條 track 出嚟，所以理論上係可以將好多條 tracks 夾落一首歌，不過就要整得好好，因為兩條 track 去一條 track 梗有 loss，但 George Martin 啲 balance 就做得好出色。」
沒有電腦的年代，有些工藝之複雜，不是我們能夠想像得到的。Joseph 仍未當監製的時候，就曾做過許冠傑〈摩登保鑣〉的錄音工作，他說原曲本來 6 分多鐘，但老闆要求 3 分鐘左右，在不能重新錄過的情況下，只能親手「剪接」，很講求準繩，一失手就大件事了。
Joseph 說當年 Lionel Richie 來港宣傳，有幸跟他吃過一頓飯，當時他就問對方，怎麼〈Stuck on You〉可以這麼好聽，究竟是怎錄出來。「佢話作嗰陣係一支結他，得個 melody，但錄嗰陣就搵咗 4 班唔同嘅 musician，喺唔同日子玩，最後先揀一個最好 feel 嘅出版。佢哋有咁嘅本錢，喺香港根本冇可能。」
不過，Joseph 說，論錄音室的水平、樂手的彈奏技巧，香港其實一點都不輸蝕，只是曲、詞、編的水準有時太參差。但他直言喜歡的樂手都是 80 年代或之前的，譬如已故的 Donald Ashley。「唔可以話新一代嘅差，只係個 style 唔啱我口味，有時我想要某啲 mood，但佢哋未必畀到我，我想試新嘅都冇用。」
即使問他欣賞的監製，也是上一代的佔多。「我好欣賞 Michael（歐丁玉），佢揀嘅歌好有流行潛力，眼光好好。我就通常 twist 多啲，唔好等佢太一般。」他說新一代的較喜歡王雙駿、Eric Kwok，但都是 90 年代出道的了，他說更新的一班不太合他口味，無法令他聽下去。
的而且確，葉廣權監製的唱片和歌曲是很不一樣的，關淑怡的唱片有如此多元化的音樂風格，已反映了這一點，現在聽也覺得沒有過時。記得當年他為陳慧嫻製作過一首〈飄〉，突破性地走較迷幻的風格，當時也備受好評。問他喜歡聽甚麼歌，他說甚麼都聽。「好聽我就聽，但我個人唔喜歡 Blues 同 Jazz，聽 Jazz 都要聽偏門一啲嘅。我好鍾意 Steely Dan，Jazz 得嚟有啲 fusion，melody 又突出，有啲 lines 我好鍾意。」另外，他說近期最喜歡是西班牙音樂廠牌 Café del Mar 的出品，「呢個 label 我好鍾意，好多 idea 我都係喺佢哋啲音樂得嚟，好 chill-out，一隻歌可以融合好多感覺。佢哋好多係雜錦碟，會搵啲專玩 electronic 同 atmospheric 氣氛嘢嘅人，將流行曲 combine 埋，感覺好正。」他說盧冠廷《Beyond Imagination》內的〈但願人長久〉，新編曲的靈感便來自 Café del Mar 的音樂。
入行 30 多年，Joseph 說工作上沒有因此失去新鮮感，反而每次都好期待。「每次都會諗啲辦法令啲歌有新元素，點編、點製作、點樣令隻歌 hit，好好玩。」他說接著都會監製新的發燒碟，正傾談中但尚未落實的，有鍾鎮濤和葉蒨文。難怪他說現在都被標籤做發燒碟了，雖然在他的製作下，盧冠廷和陳慧嫻的翻唱專輯確實比其他同類型的發燒碟更勝一籌，音樂性也更強，但我還是更渴望聽到一張由他監製、全是新歌的唱片。
特別鳴謝：雅旺錄音室（Avon Recording Studios）
緊貼最新資訊，請讚好 SPILL Facebook 專頁。
