Nikon D850 正式公佈，$3,296.95 美元的售價可算是幾大的驚喜，換算港紙大約 $25,800。同當初預計要二萬尾、甚至三萬頭的價錢平了一截；同 Canon 5D IV 剛推出時差不多。今次 D850 像素提升到 4,570 萬，採用了與旗艦機 D5 一樣的 153 點對焦系統，如此高像素之下可以達到 7fps（加手柄及 EN-EL18b 電池更可達 9fps）的高速連拍，單睇呢幾樣規格已經幾強。不過 D850 的升級其實唔止呢幾樣，今次就同大家詳細分析一下比較重要的升級，睇下呢部高像素新機係咪值得入手？
講「其他」升級之前，都值得同大家稍為解析一下 D850 的「主要」升級。4,570 萬像素解像度比起前作 D810 的 3,630 萬有幾大提升，超過了 Sony A7R II 的 4,240 萬、追近 Canon 5DS/5DSR 的 5,060 萬。阿熾就覺得像素太高普通用家其實用唔著，甚至部分專業攝影師都未必用得著，反而今次 Nikon 用到了 BSI（Backside Illuminated、背照式）的全片幅 CMOS 感光元件，集光能力會更強，可以預期在高 ISO 之下會有比較好的表現。不過始終像素密度比較高，對於高 ISO 低 noise 不要期望太大。
對焦同測光都採用了同 D5「一樣」的 153 點（中間點 -4EV）對焦及 18 萬像素測光系統，之所以強調「一樣」，係因為以前 D700 及 D3、D810 及 D4 雖然表面上都係採用一樣的對焦系統，但對焦速度係有分別的，旗艦機依然會更快。今次 D850 甚至同 D5 有一樣的獨立 AF 運算晶片，可以期待有真正一樣的對焦能力。當然實際上係咪咁，就要長少少時間等用家驗證過至知。
其實 Nikon 早在 D5 上面已經推出過靜音快門，不過 D5 的 Liveview 靜音拍攝其實有少少雞肋，因為解像度只有 5 百萬像素、而且只能拍攝 JPEG。今次 D850 則支援 4,570 萬像素的 RAW 拍攝，無任何限制。唯一可能出現的問題係「Rolling Shuter」，拍攝動態畫面時有機會出現變形。今次 D850 並無強調 Liveview 對焦速度，阿熾估計同 D5、D500 應該差不多，算係幾快。不過同 Canon Dual Pixel AF 有一定距離、同 Olympus 等高階無反爭得再遠少少。靜音快門拍攝要在 Liveview 之下進行，所以不算太強的 Liveview 對焦能力對靜音拍攝的實用性會打了少少折扣。
鎖定對焦及曝光之下，D850 靜音拍攝可以有 6fps 速度，相比起 OVF 拍攝的 7fps 也只是慢一張，而 860 萬像素 DX 模式下更可達到 30fps，十分夠用。靜音快門在教堂、音樂會、甚至運動比賽（例如高爾夫球）等場合拍攝實在太有用，今次 D850 加入這項功能值得一讚，如果可以將電子快門速度提升到同其他高階無反一樣的 1/32,000 秒就更好。
Nikon 在 D810 上引入了 S RAW 的細尺寸 RAW 格式，今次解像度更高的 D850 就有 L（45.4 MP）、M（25.6 MP）、S（11.4 MP）三種大細的 RAW 選擇，有時不需要太高像素時就可以揀細尺寸 RAW 拍攝，配合 7fps/9fps 的連拍，用作 event、wedding 拍攝使用都適合。不過，今次 D850 的細尺寸 RAW 同 D810 一樣係 12bit 無壓縮的規格，簡單來講就係檔案唔細、光暗調校能力弱、得白平衡可以比較靈活調節。
同 L 尺寸的 14bit 可無損壓縮 RAW 相比沒有太大著數，唯一係執相時速度會快少少，不過後製空間就細好多，雖然依然比 JPEG 好。今次值得一讚係 D850 可以一批過將記憶卡入面的 RAW 轉 JPEG，某些場合只影了 RAW 但臨時要畀 JPEG 客人的話，唔使用電腦、靠相機即時轉相都仲得。
D5 和 D500 上面的輕觸式屏幕限制多多，今次 D850 就幾乎解放了全部功能，做選單設定的時候可以輕觸式操作，Liveview 的時候可以輕觸對焦、甚至輕觸拍攝，播相的時候當然有得兩指放大，功能實用好多。
3.2 吋 235 萬像素屏幕有埋可上下翻轉式設計，同 D500、D750 差不多，方便高低角度用 Liveview 拍攝，而且支援「精細對焦」功能，可以將對焦點進一步縮細，特別適合落腳架、微距拍攝的時候使用。
另一樣相當適合微距拍攝應用的功能，就係內置了「Focus Stacking」，D850 識得自動調節對焦點（可手動調節間距）、並且最多可以拍攝 300 張相片、儲存在獨立的文件夾，方便直接用 Photoshop 等軟件將景深「疊加」，避免了微距、產品或者風景拍攝時景深太淺、收盡光圈都無法完全覆蓋主體的情況。值得一提的是，在相機內無法自己疊加相片的，最後都要交到第三方軟件處理。係咪設計得唔夠方便？其實又唔算，因為就算機內處理，都只可以生成 JPEG 文件，對需要用到 Focus Stacking 的用家來講，RAW 的實用性高好多，所以最後都係要另外交畀軟件處理。
外觀上面，D850 其實係同 D500 最相似（而且一樣有背光按鈕），今次 D850 移除了內置閃光燈，據 Nikon 的講法係令機身更堅固、防塵防水能力更好。實質最大好處係可以放入更大尺寸的五稜鏡，今次 D850 的觀景器放大率達到 0.75×，比起旗艦 D5 的 0.72× 仲要大，雖然望落去應該相差不遠，不過有大當然要大吧。
尤其以往 Nikon 內置閃燈一大優點係支援 CLS 閃燈系統，不過近年副廠行 2.4GHz 的引閃器同閃燈實在選擇太多、太便宜，而且比起光引閃更穩定可靠，內閃的實用性已經不高，換來更大的 OVF 同更好的防塵防水設計，其實都幾划算。
D850 今次都支援 4K/30P 拍攝，不同於 D5、D500、甚至對家 Canon 的 5D Mark IV 需要截取感光元件的中間一部分先拍到 4K，變相令拍攝視角變窄。D850 今次同 Sony 的 A7 高階系列一樣可以全片幅攝錄 4K 影像，更有利於廣角拍攝。
另外 1,920 × 1,080 的全高清拍攝亦支援 120fps，可以做到 4、5 倍的慢速鏡頭。而 HDMI 亦可以輸出 4:2:2 的 8-bit 4K 影像，支援配合外置的記錄裝置使用。加上機身設有收音咪及耳機端子，D850 作為一部專業攝錄機使用都依然幾稱職。
Nikon 近年強調中高階單反的 Time-lapse 拍攝功能，今次 D850 就支援機身內合成 4K Time-lapse 影片，同之前的機款一樣，可以自行設定拍攝張數、間隔等不同參數。另外亦支援間隔拍攝 8,256 × 5,504 解像度的相片，可以用作合成 8K Time-lapse 影片（不過就並不是機內合成）。值得一提的是，今次一批過 RAW 轉 JPEG 的功能，其實本身也是為了 Time-lapse 拍攝而設。
比較重要的一點係，今次間隔拍攝可以使用電子快門（靜音快門），換言之唔使擔心拍攝大量相片令到機械快門快速損耗，呢個設計對 Time-lapse 愛好者來說係一大福音（尤其係過了保養之後）。
今次 D850 有幾多的升級，本來阿熾預期中的 D850 大概係 4,240 萬像素（同 A7R II 差不多）、少少「閹割」了的 D5 對焦系統、同之前差不多的連拍速度。今次 D850 的升級比預計的多，不過依然仲有改善空間，起碼 Liveview 對焦速度仲可以提升、細尺寸 RAW 可以做到 14bit 無壓縮就更實用，將 Wi-Fi 功能開放、令市面上十分豐富、功能強勁的遙控 Apps 用到就更好，不過當中部分係技術問題，的確需要時間解決。至於返到係咪「值得買」的問題，其實今次 D850 的定價幾進取，以功能同規格來講的確物有所值。對焦相信無人會嫌快，問題反而係大家有無需要咁高解像度？又或者用唔用得著 4K 攝錄功能？可惜係現時 Nikon 並無另一部較低解像度、拍片功能較弱、但價錢較平的型號，或者 D750 的後繼機會是一個選擇，不過相信對焦系統又會弱一級了。
請讚好 SPILL Facebook 專頁，如想緊貼最新資訊，可於「已讚好 / Liked」選單內點按「搶先看 / See First」。
