而家要睇 HDR 內容，一係靠 UHD Blu-ray，一係就睇 Netflix 的網絡串流，有冇諗過第時大氣電波的廣播節目都可以有 HDR？早前 LG 就聯同英國廣播公司（BBC）以及衛星服務公司 SES 在盧森堡進行了一次實時演示，以 LG OLED TV 試睇以 HLG（Hybrid Log Gamma）技術廣播的 HDR 影像。

今次演示採用了 SES Astra 衛星的網絡，採用的 HLG 技術可以令傳播的影像獲得更高的對比度同色彩還原力。技術由英國 BBC 以及 日本 NHK 開發，而且可以向後兼容。即是用支援 HDR 的電視去睇的話就可以播到高動態範圍的效果，而普通電視接收到訊號的話就播 SDR 內容。最重要一點係，HLG 技術可以完全兼容現有的廣播系統，無須硬件上的大改就已經可以應用，令 SDR 廣播變成 HDR 廣播更加容易。現時SES 已經有一條測試用的 HDR 頻道播緊，等業界人士可以新的顯示標準同內容，睇嚟 HDR 廣播都指日可待，不過香港呢方面一向遲人一步，大家可能要等耐少少了。